भारताने ठार केलेल्या ‘लष्कर’ दहशतवाद्याचा पाकिस्तानने आणला ‘डुप्लिकेट’

जर प्रचार आणि स्वतःचीच खिल्ली उडवून घेण्याची स्पर्धा झाली, तर पाकिस्तान त्यातील प्रमुख दावेदार ठरेल, अशी टीका या प्रकरणानंतर होत आहे. भारतीय लष्कराने लष्कर-ए-तोयबाचा कमांडर आणि पाकिस्तानच्या स्पेशल सर्व्हिस ग्रुपचा माजी कमांडो मोहम्मद आसिफ याला ठार केल्याचा दावा केल्यानंतर अवघ्या एका दिवसाने पाकिस्तानने त्याच नावाचा एक व्यक्ती माध्यमांसमोर आणला. भारताच्या दाव्याला आव्हान देण्यासाठी पाकिस्तानने हा व्यक्ती सादर केल्याचे सांगण्यात आले.

बुधवारी जम्मू-काश्मीरमधील बडगाम जिल्ह्यात झालेल्या चकमकीत भारतीय सुरक्षा दलांनी मोहम्मद आसिफ उर्फ हाशिम मूसा याला ठार केल्याचा दावा केला होता. मात्र, त्यानंतर गुरुवारी पाकिस्तानने मोहम्मद आसिफ असल्याचा दावा करत एका व्यक्तीला माध्यमांसमोर आणले.

पाकिस्तानच्या या दाव्यावर स्वतंत्र ओपन-सोर्स इंटेलिजन्स अर्थात ओएसआयएनटी विश्लेषकांनी प्रश्न उपस्थित केले. पाकिस्तानने माध्यमांसमोर आणलेल्या व्यक्तीच्या चेहऱ्याची आणि शरीररचनेची तुलना हाशिम मूसा यांच्या जुन्या छायाचित्रांशी करण्यात आली. कानांची रचना, नाकाचा आकार आणि डोळ्यांची मांडणी यामध्ये फरक असल्याचा दावा काही ओएसआयएनटी खात्यांनी केला आहे. मात्र, या तुलनांची स्वतंत्रपणे पडताळणी झालेली नसल्याचेही संबंधित वृत्तात नमूद करण्यात आले आहे.

हे ही वाचा:

जागतिक अन्नधान्याच्या किमती चार वर्षांच्या उच्चांकावर

भारताला दिवसभरात सहा सुवर्णपदकं!

मतदार यादीत नाव आहे म्हणून आंदोलन!

एचडीएफसी बँकेच्या नव्या सीईओची घोषणा

पाकिस्तानच्या दाव्यावर प्रश्नचिन्ह

पाकिस्तानच्या इंटर-सर्व्हिसेस पब्लिक रिलेशन्स अर्थात डीजी आयएसपीआरचे प्रमुख लेफ्टनंट जनरल अहमद शरीफ चौधरी यांनी गुरुवारी पत्रकार परिषदेत या व्यक्तीला माध्यमांसमोर सादर केले. या व्यक्तीने स्वतःची ओळख मोहम्मद आसिफ अशी करून दिली. आपण पाकिस्तानच्या स्पेशल सर्व्हिस ग्रुपमध्ये कार्यरत होतो आणि २०२३ मध्ये हवालदार पदावरून निवृत्त झाल्याचा दावा त्याने केला.

त्याने सांगितले की, २००० मध्ये पाकिस्तानच्या लष्करात भरती झाल्यानंतर २००५ मध्ये स्पेशल सर्व्हिस ग्रुपमध्ये प्रवेश केला. त्यानंतर १८ वर्षे सेवा बजावली आणि २०२३ मध्ये निवृत्त झालो. “मी जिवंत असून तुमच्यासमोर उपस्थित आहे,” असा दावाही त्याने केला. एखाद्या भारतीय दाव्याला खोडून काढण्यासाठी पाकिस्तानने एखाद्या विद्यमान किंवा निवृत्त पाकिस्तानी सैनिकाला अशा प्रकारे कॅमेऱ्यासमोर आणल्याचे उदाहरण दुर्मीळ असल्याचे वृत्तात नमूद करण्यात आले आहे.

मात्र, पाकिस्तानने समोर आणलेल्या व्यक्तीची तुलना हाशिम मूसा उर्फ ‘फौजी’ यांच्या जुन्या छायाचित्रांशी केल्यानंतर अनेक विश्लेषकांनी त्यांच्या चेहऱ्याच्या वैशिष्ट्यांमध्ये फरक असल्याचा दावा केला आहे. कान, नाक आणि डोळ्यांची रचना यामध्ये तफावत असल्याचे या विश्लेषकांचे म्हणणे आहे. मात्र, या दाव्याची स्वतंत्रपणे पुष्टी झालेली नाही.

कोण होता मोहम्मद आसिफ ?

मोहम्मद आसिफ उर्फ हाशिम मूसा हा जम्मू-काश्मीरच्या पीर पंजाल परिसर आणि काश्मीर खोऱ्यात नागरिक तसेच सुरक्षा दलांना लक्ष्य करणाऱ्या अनेक घातक हल्ल्यांशी संबंधित असल्याचे भारतीय सुरक्षा यंत्रणांचे म्हणणे होते. बुधवारी यूसमर्ग येथे झालेल्या चकमकीत तो ठार झाल्याचा दावा भारतीय सुरक्षा दलांनी केला.

२०२५ मधील पहलगाम दहशतवादी हल्ल्यानंतर ज्या चार लष्कर-ए-तोयबा दहशतवाद्यांची छायाचित्रे मोठ्या प्रमाणावर व्हायरल झाली होती, त्यापैकी हाशिम मूसा हा एक होता. पहलगाममधील या दहशतवादी हल्ल्यात २५ पर्यटकांचा मृत्यू झाला होता. या चारही दहशतवाद्यांचा वेगवेगळ्या चकमकींमध्ये सुरक्षा दलांनी खात्मा केल्याचा दावा करण्यात आला आहे.