भाजपाने दुकाने बंद केल्याने आंदोलकांची खरेदीची संधी हुकली!

राहुल गांधींनी १ नोव्हेंबरला दिल्लीत ज्ञानेश कुमारांच्या राजीनाम्याची मागणी करण्यासाठी रामलीला मैदानावर सभेचे आयोजन केले होते. ही सभा त्यांनी घेऊ नये असे आवाहन व्यापारी महासंघाने केले होते. मात्र या सभेआधी राहुल गांधींनी भाजपावरच आरोप केला की, त्यांनीच दुकाने बंद ठेवण्यासाठी व्यापाऱ्यांना भाग पाडले.

मुख्य निवडणूक आयुक्त ज्ञानेश कुमार यांच्या विरोधात इंडिया आघाडीने आयोजित केलेल्या भव्य मोर्चात सहभागी होताना राहुल गांधी यांनी एक व्हिडिओ प्रसिद्ध केला. या व्हिडिओमध्ये त्यांनी भाजपने जबरदस्तीने सर्व दुकाने बंद केल्यामुळे मोर्चात सहभागी झालेल्या नागरिकांना खरेदी करता आली नसल्याचा आरोप केला.

राहुल गांधी म्हणाले, “आम्ही सर्वांना सांगितले होते की, मोर्चा आणि सभेसाठी दिल्लीला येताना खरेदी करा, स्थानिक व्यापाऱ्यांकडून वस्तू घ्या. मात्र, येथे कॅनॉट प्लेसकडे येताना भाजपने प्रत्येक दुकान जबरदस्तीने बंद केल्याचे आम्हाला समजले. त्यामुळे व्यापाऱ्यांचे नुकसान कोण करत आहे आणि ते कशा प्रकारे होत आहे, हे जनतेने समजून घेतले पाहिजे.”

यापूर्वी भाजप नेत्यांनी राहुल गांधी आणि काँग्रेसवर सणासुदीच्या हंगामात व्यापाऱ्यांचे नुकसान केल्याचा आरोप केला होता.

नड्डा यांचा राहुल गांधींवर पलटवार

भाजपचे राष्ट्रीय अध्यक्ष जे. पी. नड्डा यांनी धनत्रयोदशी, दिवाळी आणि छठपूजेचा संदर्भ देत राहुल गांधी यांच्यावर टीका केली. सणासुदीचा काळ हा छोटे व्यापारी, फेरीवाले आणि दुकानदारांसाठी वर्षातील महत्त्वाच्या उत्पन्नाचा काळ असतो. मात्र, राहुल गांधी यांना या व्यापाऱ्यांच्या आर्थिक अडचणींची पर्वा नसल्याचा आरोप त्यांनी केला.

चेंबर ऑफ ट्रेड अँड इंडस्ट्री (CTI) या व्यापारी संघटनेने राहुल गांधी, सोनिया गांधी, समाजवादी पक्षाचे प्रमुख अखिलेश यादव आणि तृणमूल काँग्रेसच्या नेत्या ममता बॅनर्जी यांना पत्र लिहून सणासुदीच्या काळात दिल्लीत मोठ्या राजकीय सभा आयोजित करू नयेत, अशी विनंती केल्याचे नड्डा यांनी सांगितले.

यापूर्वीच्या आंदोलनांमुळे दिल्लीतील व्यापाऱ्यांचे सुमारे ३ हजार कोटी रुपयांचे नुकसान झाल्याचा दावा नड्डा यांनी केला. तर यावेळच्या सभेमुळे १० हजार कोटी रुपयांपेक्षा अधिक नुकसान होण्याची शक्यता त्यांनी व्यक्त केली. चांदनी चौक, सदर बाजार, खारी बावली आणि करोल बाग यांसारख्या प्रमुख व्यापारी भागांतील छोट्या व्यापाऱ्यांना या आंदोलनाचा फटका बसू शकतो, असेही त्यांनी म्हटले.

हे ही वाचा:

वनमंत्री गणेश नाईक यांनी केले ‘लोहपुरुष’ दसरा-दिवाळी अंकाचे कौतुक

‘शीख नरसंहाराच्या दिवशी काँग्रेसने रॅली काढत जखमांवर मीठ चोळले…’

चीनच्या खनिजसंपत्तीत मोठी भर

हा विरोधी पक्ष नव्हे, तर अडथळा पक्ष!

यापूर्वी राहुल गांधी यांनी इंडिया आघाडीच्या सभेला येणाऱ्या नागरिकांना दिल्लीतील स्थानिक बाजारपेठांमध्ये खरेदी करण्याचे आवाहन केले होते. शनिवारी सोशल मीडियावर पोस्ट करत त्यांनी लाखो नागरिक दिल्लीमध्ये येणार असल्याचे सांगितले होते. आंदोलन, मोर्चे आणि सभा यांसोबतच थोडी खरेदीही करा, त्यामुळे स्थानिक व्यापाऱ्यांना फायदा होईल, असे आवाहन त्यांनी केले होते. तसेच नागरिकांना दिवाळीच्या शुभेच्छाही दिल्या होत्या.

दरम्यान, चेंबर ऑफ ट्रेड अँड इंडस्ट्रीने या सभेमुळे रामलीला मैदानाच्या १० किलोमीटर परिसरातील सुमारे अडीच लाख दुकाने बंद राहण्याची शक्यता व्यक्त केली होती. संघटनेचे अध्यक्ष बृजेश गोयल यांच्या म्हणण्यानुसार, दिल्लीतील २० बाजारपेठांमधील जवळपास ८० टक्के व्यापार प्रभावित होऊ शकतो. त्यामुळे दिवाळीच्या काळातील दररोज १० ते १२ हजार कोटी रुपयांच्या व्यापारावर परिणाम होण्याची भीती त्यांनी व्यक्त केली आहे.