सौरभ भारद्वाज ‘आप’च्या दिल्ली प्रदेशाध्यक्षपदी तर मनीष सिसोदिया यांना पंजाबची जबाबदारी

दिल्ली विधानसभा निवडणुकीत आप पक्षाला दारुण पराभव स्वीकारावा लागला. यासोबतच पक्षाचे अनेक बडे नेतेही पराभूत झाले. यानंतर पक्षाचे नेते अरविंद केजरीवाल यांनी आपले लक्ष सध्या पंजाबकडे वळवले आहे. तर, दुसरीकडे आम आदमी पक्षाने काही महत्त्वाचे बदल केले आहेत. शुक्रवारी दिल्ली युनिटच्या पक्षप्रमुखपदी सौरभ भारद्वाज यांची तर पंजाबमध्ये पक्षप्रमुखपदी माजी उपमुख्यमंत्री मनीष सिसोदिया यांची नियुक्ती करण्यात आली आहे. गोपाल राय आणि पंकज गुप्ता यांना गुजरात आणि गोव्याचे प्रभारी बनवण्यात आले आहे.

दिल्लीतील पराभवानंतर पक्षाने विविध राज्य युनिट्ससाठी नवीन प्रमुखांची घोषणा केली आहे. गोपाळ राय गुजरातचे नेतृत्व करतील. पुढील विधानसभा निवडणुकीसाठी पक्ष पूर्ण ताकदीने काम करेल असा विश्वास राय यांनी व्यक्त केला आहे. पंकज गुप्ता गोवा युनिटचे नेतृत्व करतील आणि संदीप पाठक छत्तीसगडचे नेतृत्व करतील. आप नेते मेहराज मलिक जम्मू-काश्मीर युनिटचे नेतृत्व करतील.

पत्रकारांशी बोलताना सौरभ भारद्वाज म्हणाले की, “दिल्ली निवडणुकीत आपचा मतदानाचा वाटा ४३.५ टक्के होता, तर भाजपचा ४५.५ टक्के होता. यावरून असे दिसून येते की, भाजपने आमच्याविरुद्ध पोलिस आणि प्रशासनाचा सर्व वापर करूनही दिल्लीतील जवळजवळ अर्ध्या लोकांनी आम्हाला मतदान केले होते. आम्ही पक्षाला आणखी मजबूत करू. माझा असा विश्वास आहे की पराभवानंतर संघटना बांधणे सर्वात सोपे असते, कारण जिंकण्याच्या वेळी बरेच लोक तुमच्यात सामील होतात. पण पक्षाच्या पराभवाच्या वेळीही जो तुमच्यासोबत राहतो तो शुद्ध सोन्याचा असतो. ते २४ कॅरेट सोने आहे, त्यामुळे तुम्हाला पितळ आणि सोने यात फरक करण्यात कोणतीही अडचण येणार नाही.”

हे ही वाचा : 

उद्धव ठाकरेंशी संबंध राहिला नाही, तर राज ठाकरेंशी संबध राहिलाय!

पाकिस्तानचा भारतावर आरोप, म्हणाले दहशतवादाला प्रोत्साहन देतो!

उद्यापासून आयपीएलचे बिगुल वाजणार!

जालना जिल्ह्यात बेकायदेशीररित्या दिलेले ३५९५ जन्म प्रमाणपत्र रद्द

मनीष सिसोदिया म्हणाले की, राज्यात पक्षाचे सरकार स्थापन झाल्यानंतर पंजाबमध्ये अनेक विकासकामे झाली आहेत. आप सरकार पंजाबच्या लोकांच्या कल्याणासाठी काम करत राहील आणि आपच्या प्रत्येक समर्पित कार्यकर्त्याला पक्षाचा भाग असल्याचा अभिमान वाटेल याची खात्री करेल. पंजाबचे लोक अरविंद केजरीवाल आणि पंजाबचे मुख्यमंत्री भगवंत मान यांचा खूप आदर करतात.