१७ वर्षीय क्रिकेटपटू नंदिनीची आत्महत्या

भारतीय क्रिकेट नियामक मंडळाच्या (बीसीसीआय) १९ वर्षांखालील महिला क्रिकेट संघात नुकतीच निवड झालेल्या तेलंगणातील १७ वर्षीय क्रिकेटपटू नंदिनी हिच्या आत्महत्येच्या घटनेने क्रीडाविश्वात खळबळ उडाली आहे. विकाराबाद शहरातील मधू कॉलनी परिसरात आजीच्या घरी तिने आत्महत्या केल्याची घटना शुक्रवारी सकाळी उघडकीस आली. नंदिनीच्या निधनामुळे तिच्या कुटुंबीयांसह संपूर्ण जिल्ह्यात शोककळा पसरली आहे.

नंदिनीच्या मृत्यूनंतर तिच्या कुटुंबीयांनी आणि नातेवाइकांनी रस्त्यावर उतरून आंदोलन केले. नंदिनीला न्याय मिळावा, तसेच तिच्या छळाला जबाबदार असलेल्या व्यक्तींना तातडीने अटक करून त्यांच्यावर कठोर कारवाई करावी, अशी मागणी आंदोलकांनी केली. कुटुंबीयांनी दोन व्यक्तींवर छळ केल्याचा गंभीर आरोप केला आहे.

विकाराबादचे पोलीस निरीक्षक रघू यांनी दिलेल्या माहितीनुसार, शुक्रवारी सकाळी सुमारे ९ वाजता पोलिसांना नंदिनीच्या मृत्यूची माहिती मिळाली. त्यानंतर पोलिसांचे पथक तातडीने घटनास्थळी दाखल झाले. प्राथमिक तपासात नंदिनीने आत्महत्या केल्याचे समोर आले आहे. दरम्यान, तिच्या वडिलांनी दिलेल्या तक्रारीवरून पोलिसांनी आकस्मिक मृत्यूची नोंद केली आहे.

पोलिसांनी नंदिनीचा मोबाईल फोन ताब्यात घेतला असून तो न्यायवैद्यक तपासणीसाठी पाठवण्यात येणार आहे. तिच्या इन्स्टाग्राम, फेसबुक आणि व्हॉट्सॲप खात्यांचीही तपासणी केली जाणार आहे. सोशल मीडियाच्या माध्यमातून तिचा कोणी छळ केला होता का, याचा शोध पोलीस घेत आहेत. तपास आणि न्यायवैद्यक अहवालातील निष्कर्षांनंतर दोषींवर योग्य ती कारवाई केली जाईल, असे पोलीस निरीक्षकांनी स्पष्ट केले.

शुक्रवारी सकाळी शवविच्छेदन करण्यात आले. त्यानंतर मृतदेह कुटुंबीयांच्या ताब्यात देण्यात आला. नंदिनी ही विकाराबाद जिल्ह्यातील यालाल मंडळातील संगयापल्ली गावची रहिवासी होती. क्रिकेटचे प्रशिक्षण आणि शिक्षण घेण्यासाठी ती विकाराबाद येथे आजीसोबत राहत होती.

अलीकडेच बीसीसीआयच्या १९ वर्षांखालील महिला क्रिकेट संघात तिची निवड झाली होती. या निवडीमुळे नंदिनीच्या गावासह संपूर्ण जिल्ह्याची मान उंचावली होती. तिच्या रूपाने भारतीय क्रिकेटला एक उदयोन्मुख खेळाडू मिळेल, अशी अपेक्षा व्यक्त केली जात होती. मात्र, क्रिकेटच्या मैदानावर मोठी कामगिरी करण्याचे तिचे स्वप्न पूर्ण होण्यापूर्वीच तिचा जीवनप्रवास संपल्याने सर्वत्र हळहळ व्यक्त होत आहे.

कुटुंबीयांनी केलेले छळाचे आरोप अद्याप सिद्ध झालेले नसून पोलीस त्यांचा तपास करत आहेत.