एशिया कप २०२५ मध्ये झळाळून उठलेल्या भारताच्या दोन खेळाडूंना मोठा सन्मान मिळाला आहे. टीम इंडियाचे तरुण तडफदार फलंदाज अभिषेक शर्मा आणि फिरकीपटू कुलदीप यादव यांची आयसीसीकडून ‘पुरुष महिन्याचा सर्वोत्तम खेळाडू (Player of the Month)’ या पुरस्कारासाठी निवड करण्यात आली आहे. त्यांच्यासोबत झिंबाब्वेचा ब्रायन बेनेट हेदेखील नामांकित झाला आहे.
अभिषेक शर्माने एशिया कपदरम्यान अपूर्व फॉर्म दाखवला. डावखुऱ्या या फलंदाजाने ७ टी-२० सामन्यांत ३१४ धावा केल्या आणि त्यात ३ अर्धशतके झळकावली. तो संपूर्ण स्पर्धेतील सर्वाधिक धावा करणारा फलंदाज ठरला आणि त्याला ‘प्लेअर ऑफ द टूर्नामेंट’ म्हणून गौरवण्यात आले.
अभिषेकने ९३१ गुणांसह पुरुषांच्या टी-२० क्रिकेट इतिहासातील सर्वोच्च फलंदाजी रेटिंग मिळवण्याचा विक्रमही आपल्या नावावर केला आहे.
दुसरीकडे, डावखुरा फिरकीपटू कुलदीप यादवने एशिया कप २०२५ मध्ये ६.२७ च्या इकॉनॉमी रेटसह १७ बळी घेतले. तो या स्पर्धेतील सर्वाधिक बळी घेणारा गोलंदाज ठरला. त्याचबरोबर त्याच्या फलंदाजीतूनही ३२ चौकार आणि १९ षटकार ठोकले गेले.
कुलदीपने बांगलादेशविरुद्ध १८ धावांत ३ बळी, तर पाकिस्तानविरुद्धच्या अंतिम सामन्यात ३० धावांत ४ बळी घेत संघाला विजय मिळवून दिला.
भारताने एशिया कप २०२५ च्या अंतिम सामन्यात पाकिस्तानचा ५ गडी राखून पराभव करत विजेतेपद पटकावले. संपूर्ण स्पर्धेत भारताने पाकिस्तानला तब्बल तीन वेळा हरवले आणि अखेरपर्यंत अपराजित राहिला.
झिंबाब्वेचा ब्रायन बेनेट देखील सप्टेंबर महिन्यात जबरदस्त फॉर्ममध्ये होता. त्याने ९ टी-२० सामन्यांत ५५.२२ च्या सरासरीने ४९७ धावा केल्या.
श्रीलंका आणि नामिबियाविरुद्ध मालिकेत उत्कृष्ट कामगिरी केल्यानंतर, त्याने आयसीसी पुरुष टी-२० वर्ल्ड कप आफ्रिका रिजनल फायनलमध्ये जबरदस्त खेळ कायम ठेवला आणि पहिल्या ३ डावांत अनुक्रमे ७२, ६५ आणि १११ धावा केल्या. बेनेटने झिंबाब्वेला २०२६ टी-२० विश्वचषकासाठी पात्र ठरवण्यात महत्त्वाची भूमिका बजावली आहे.
