१०.१४ सेकंदांत इतिहास; अनिमेश कुजूरची जर्मनीत विक्रमी कामगिरी

धावपटू अनिमेश कुजूर परदेशात १०० मीटर धावणारा सर्वात वेगवान भारतीय ठरला आहे. त्याने जर्मनीतील एका ॲथलेटिक्स स्पर्धेत १०० मीटर अंतर १०.१४ सेकंदात पूर्ण केले. वर्ल्ड ॲथलेटिक्स कॉन्टिनेंटल टूर चॅलेंजर-स्तरीय स्पर्धेच्या अंतिम फेरीत तो दुसऱ्या स्थानी राहिला. दक्षिण आफ्रिकेच्या आर. म्लेंगाने १०.०३ सेकंदांची वेळ नोंदवत प्रथम क्रमांक पटकावला.

दुसरी सर्वात वेगवान कामगिरी

२३ वर्षीय अनिमेशने स्वतःच्याच विक्रमात सुधारणा करून वैयक्तिक सर्वोत्तम कामगिरी नोंदवली. अनिमेशने नोंदवलेली १०.१४ सेकंदांची वेळ ही भारतीय इतिहासातील १०० मीटर धावण्याची दुसरी सर्वात वेगवान कामगिरी आहे. राष्ट्रीय विक्रम १०.०९ सेकंदांचा असून, तो याच वर्षी रांची येथे झालेल्या फेडरेशन कपमध्ये गुरिंदरवीर सिंगने नोंदवला होता.

२४ तासांत तीन वेळा विक्रम मोडला

मे महिन्यात झालेल्या फेडरेशन कपमध्ये भारतीय स्प्रिंटिंगमध्ये एक मोठे स्थित्यंतर पाहायला मिळाले. गुरिंदरवीर सिंगने १०.१७ सेकंदांची वेळ नोंदवून अनिमेशचा विक्रम मोडला. त्यानंतर अनिमेशने १०.१५ सेकंदांची वेळ नोंदवून तो विक्रम सुधारला. दुसऱ्याच दिवशी, गुरिंदरवीर १०.०९ सेकंदांची वेळ नोंदवून भारताचा सर्वात वेगवान धावपटू ठरला.

हे ही वाचा:

व्हॉट्सऍपच्या वादामुळे मेसेजिंग ऍप्ससाठी येणार एकसमान नियम!

आईच्या हत्येप्रकरणी नवे वळण; वडिलांच्या मृत्यूबाबतही मुलीवर आरोप

भारत जागतिक विकासाचे लाँचपॅड!

‘रोडमॅप २०३०’ला मंजुरी; भारत-न्यूझीलंड व्यापार दुप्पट करण्याचे लक्ष्य

सर्वांचे लक्ष राष्ट्रकुल खेळांवर असेल

अनीमेश कुजूरने २०२६ च्या राष्ट्रकुल खेळांसाठी भारताच्या १०० मीटर आणि २०० मीटर संघात आधीच पात्रता मिळवली आहे. जर्मनीतील स्पर्धेनंतर, तो पोलंडमधील स्पाला येथे भारतीय संघाच्या प्रशिक्षण शिबिरात सामील होईल. त्यानंतर तो ग्लासगो येथे होणाऱ्या राष्ट्रकुल खेळांमध्ये भारताचे प्रतिनिधित्व करेल.