पंजाब किंग्सचा वेगवान गोलंदाज अर्शदीप सिंग पुन्हा एकदा वादाच्या भोवऱ्यात अडकला आहे. मुंबई इंडियन्सचा फलंदाज तिलक वर्मासोबतचा त्याचा एक व्हिडिओ सोशल मीडियावर व्हायरल झाल्यानंतर मोठा गदारोळ निर्माण झाला आहे.
हा व्हिडिओ कथितरित्या अर्शदीपने ‘स्नॅपचॅट’वर शेअर केला होता. त्यामध्ये खेळाडूंमधील हलक्याफुलक्या गप्पा आणि मजा-मस्ती दिसत होती. मात्र, त्या संभाषणातील काही शब्दांमुळे आता वर्णद्वेषाच्या चर्चेला तोंड फुटले आहे.
व्हिडिओमध्ये अर्शदीप तिलक वर्माला मजेत “अंधेरे” असे संबोधताना दिसतो. त्यानंतर तो तिलकला “सनस्क्रीन लाव” असंही म्हणतो. या संभाषणात मुंबई इंडियन्सचा खेळाडू नमन धीरही दिसतो. अर्शदीप त्याला पंजाबचा खरा “नूर” म्हणजेच “प्रकाश” असल्याचं म्हणतो.
यानंतर नमनने “नूर” या शब्दाचा अर्थ तिलकला सांगितला. त्यावर तिलकनेही हसत उत्तर देत आपण आधीपासून सनस्क्रीन वापरत असल्याचं सांगितलं.
खेळाडूंमधील हा संवाद पूर्णपणे हलक्याफुलक्या वातावरणात झाला असला तरी सोशल मीडियावर मात्र यावरून तीव्र प्रतिक्रिया उमटू लागल्या. अनेक युजर्सनी अर्शदीपच्या वक्तव्यावर टीका करत त्यात वर्णद्वेषाची झलक असल्याचा आरोप केला.
काहींनी या टिप्पणींना “असंवेदनशील” म्हटलं, तर काहींनी मोठा फॅनबेस असलेल्या सार्वजनिक व्यक्तींनी अशा प्रकारची भाषा वापरणं योग्य आहे का, असा सवाल उपस्थित केला.
दरम्यान, अर्शदीप याआधीही सोशल मीडिया पोस्टमुळे वादात सापडला होता. त्याच्या यूट्यूब व्लॉगमध्ये युजवेंद्र चहल विमानात वेपिंग करताना दिसल्याने त्यावेळीही मोठा वाद निर्माण झाला होता.
सोशल मीडियावर प्रचंड सक्रिय असलेल्या अर्शदीपचे इंस्टाग्रामवर तब्बल ६२ लाखांहून अधिक फॉलोअर्स आहेत. तो नेहमीच ‘बिहाइंड द सीन्स’ प्रकारचे व्हिडिओ आणि मजेशीर कंटेंट शेअर करत असतो.
