फिफा विश्वचषक २०२६ स्पर्धेतील ग्रुप ‘सी’मधील ब्राझील आणि मोरोक्को यांच्यातील रंगतदार सामना १-१ अशा बरोबरीत संपला. दोन्ही संघांनी आक्रमक खेळ करत चाहत्यांना अखेरपर्यंत रोमांचित ठेवले.
सामन्याच्या २१व्या मिनिटाला मोरोक्कोने आघाडी घेतली. ब्राहिम डियाझच्या अचूक पासवर इस्माईल सायबारी याने ब्राझीलचा गोलरक्षक अॅलिसनला चकवत चेंडू जाळ्यात धाडला आणि मोरोक्कोला १-० अशी आघाडी मिळवून दिली.
मात्र ब्राझीलनेही जोरदार प्रत्युत्तर दिले. ३२व्या मिनिटाला ब्रुनो गिमारेसच्या उत्कृष्ट पासवर विनिसियस ज्युनियर याने आपल्या कौशल्याचा नमुना दाखवत शानदार गोल नोंदवला. त्याच्या या गोलमुळे ब्राझीलने सामना १-१ असा बरोबरीत आणला.
पहिल्या सत्राअखेर ब्राझीलला आघाडी घेण्याची संधी मिळाली होती, पण मोरोक्कोचा गोलरक्षक यासीन बुनू याने अप्रतिम बचाव करत संघाला दिलासा दिला. दुसऱ्या सत्रातही बुनूने अनेक महत्त्वाचे बचाव केले. दोन्ही संघांनी गोलसाठी आटोकाट प्रयत्न केले, मात्र निर्णायक गोल कुणालाही करता आला नाही.
विनिसियसचा गोल, पण विजय हुकला
या सामन्याने एक विशेष नोंदही केली. विनिसियस ज्युनियरने गोल केलेल्या सामन्यांमध्ये ब्राझीलने यापूर्वीचे सर्व ८ सामने जिंकले होते. मात्र यावेळी त्याच्या गोलनंतरही ब्राझीलला विजय मिळवता आला नाही.
एंसेलोटी नाराज
सामन्यानंतर ब्राझीलचे मुख्य प्रशिक्षक कार्लो एंसेलोटी म्हणाले, “आमची सुरुवात चांगली झाली नाही. पहिल्या सत्रात आम्हाला खूप संघर्ष करावा लागला. मोरोक्को हा अत्यंत मजबूत संघ आहे. दुसऱ्या सत्रात आम्ही सुधारलो, पण या कामगिरीवर पूर्णपणे समाधानी नाही. आता आमचे लक्ष पुढील सामन्यावर आहे.”
मोरोक्कोच्या शिस्तबद्ध बचावासमोर ब्राझीलच्या स्टार खेळाडूंना अपेक्षित चमक दाखवता आली नाही आणि अखेर दोन्ही संघांना प्रत्येकी एका गुणावर समाधान मानावे लागले.
