भारतीय क्रिकेट संघाचे मुख्य प्रशिक्षक गौतम गंभीर यांनी युवा फलंदाज साई सुदर्शन याच्यावर मोठा विश्वास व्यक्त करत त्याला पुरेशा संधी दिल्या जातील, असे स्पष्ट संकेत दिले आहेत. गंभीर यांच्या या वक्तव्यानंतर अफगाणिस्तानविरुद्ध ६ जूनपासून होणाऱ्या एकमेव कसोटी सामन्यात तिसऱ्या क्रमांकावर साई सुदर्शनच फलंदाजीला उतरेल, हे जवळपास निश्चित मानले जात आहे.
पत्रकार परिषदेत बोलताना गंभीर यांनी सुदर्शनच्या क्षमतेचे भरभरून कौतुक केले. ते म्हणाले, “माझा नेहमीच असा विश्वास राहिला आहे की कोणत्याही खेळाडूला स्वतःची क्षमता सिद्ध करण्यासाठी पुरेशा संधी मिळाल्या पाहिजेत. साई सुदर्शन सध्या खराब फॉर्ममध्ये नाही. उलट तो आयपीएल २०२६ मध्ये ७०० हून अधिक धावा करून आला आहे. अशा परिस्थितीत एखाद्या खेळाडूचे मूल्यमापन फक्त चार-पाच डावांच्या आधारावर करणे योग्य नाही.”
गंभीर यांनी निवड प्रक्रियेबाबतही स्पष्ट भूमिका मांडली. “जर एखाद्या खेळाडूला पाच सामने दिले जात असतील, तर दुसऱ्या खेळाडूला फक्त एक-दोन संधी देऊन त्याचा न्याय करता येणार नाही. सध्या आम्हाला साई सुदर्शनसोबत पुढे जायचे आहे आणि त्याला सातत्याने संधी द्यायच्या आहेत. तो वर्ल्ड क्लास खेळाडू आहे आणि तो उत्कृष्ट कामगिरी करेल, याची मला पूर्ण खात्री आहे,” असे गंभीर म्हणाले.
कसोटीत स्वतःला सिद्ध करण्याची मोठी संधी
साई सुदर्शनने आतापर्यंत भारतासाठी ६ कसोटी सामने खेळले आहेत. या सामन्यांतील ११ डावांत त्याने २७ च्या सरासरीने ३०२ धावा केल्या आहेत. त्याच्या नावावर दोन अर्धशतकेही आहेत. मात्र, अजूनही त्याला मोठी खेळी करण्याची प्रतीक्षा आहे.
अफगाणिस्तानविरुद्धच्या या एकमेव कसोटीत सुदर्शनकडे स्वतःची क्षमता सिद्ध करण्याची सुवर्णसंधी असेल. विशेषतः संघ व्यवस्थापनाचा आणि प्रशिक्षकांचा इतका मोठा पाठिंबा मिळाल्यामुळे त्याच्याकडून मोठ्या खेळीची अपेक्षा व्यक्त केली जात आहे.
आयपीएलमध्ये धडाकेबाज कामगिरी
आयपीएल २०२६ मध्ये गुजरात टायटन्सकडून खेळताना साई सुदर्शनने अक्षरशः धावांचा पाऊस पाडला. त्याने १७ सामन्यांत १५७ च्या स्ट्राइक रेटने तब्बल ७२२ धावा फटकावत सर्वांचे लक्ष वेधून घेतले. त्याच्या सातत्यपूर्ण कामगिरीमुळेच त्याला पुन्हा एकदा भारतीय कसोटी संघात महत्त्वाची भूमिका मिळण्याची शक्यता निर्माण झाली आहे.
भारत आणि अफगाणिस्तान यांच्यातील एकमेव कसोटी सामना ६ जूनपासून मुल्लांपूर येथील महाराजा यादवेंद्र सिंह आंतरराष्ट्रीय क्रिकेट स्टेडियममध्ये खेळवला जाणार आहे.
