इंडियन प्रीमियर लीगमध्ये आतापर्यंत १८ हंगाम खेळले गेले असून, अनेक फलंदाजांनी आपल्या दमदार कामगिरीने चाहत्यांची मने जिंकली आहेत. मात्र काही खेळाडूंनी एका सीजनमध्येच शतकांची आतषबाजी करत इतिहास रचला. चला जाणून घेऊया, एका हंगामात सर्वाधिक शतके झळकावणाऱ्या टॉप-३ फलंदाजांबद्दल…
१) विराट कोहली (आरसीबी) – ४ शतके (आयपीएल २०१६)
विराट कोहलीने २०१६ चा IPL हंगाम अक्षरशः गाजवला. त्याने १६ सामन्यांत तब्बल ९७३ धावा करत विक्रम प्रस्थापित केला. या दरम्यान त्याने ४ शतके ठोकत गोलंदाजांचा चांगलाच समाचार घेतला. ८१.०८ च्या सरासरीने खेळताना कोहलीने ३८ षटकार आणि ८३ चौकार लगावले.
कोहलीच्या IPL कारकिर्दीवर नजर टाकली तर त्याने २६७ सामन्यांत ३९.५४ च्या सरासरीने ८,६६१ धावा केल्या आहेत. त्याच्या नावावर एकूण ८ शतके आणि ६३ अर्धशतके आहेत.
२) जोस बटलर (राजस्थान रॉयल्स) – ४ शतके (आयपीएल २०२२)
इंग्लंडचा धडाकेबाज फलंदाज जोस बटलरने २०२२ मध्ये कोहलीच्या विक्रमाशी बरोबरी केली. राजस्थान रॉयल्सकडून खेळताना त्याने १७ सामन्यांत ८६३ धावा केल्या आणि ४ शतके झळकावली.
या हंगामात बटलरने ४५ षटकार आणि ८३ चौकार ठोकले. त्याच्या IPL कारकिर्दीत १२१ सामन्यांत ४,१२० धावा असून, त्याने ७ शतके आणि २४ अर्धशतके केली आहेत.
३) शुभमन गिल (गुजरात टायटन्स) – ३ शतके (आयपीएल २०२३)
गुजरात टायटन्सचा स्टार फलंदाज शुभमन गिलने २०२३ मध्ये आपल्या बॅटने कमाल केली. १७ सामन्यांत ८९० धावा करत तो त्या हंगामातील सर्वाधिक धावा करणारा फलंदाज ठरला.
गिलने या सीजनमध्ये ३ शतके झळकावली, तसेच ३३ षटकार आणि ८५ चौकार ठोकले. त्याच्या IPL कारकिर्दीत ११८ सामन्यांत ३,८६६ धावा असून, त्याने ४ शतके आणि २६ अर्धशतके केली आहेत.
