ब्राझिलच्या स्पर्धेसाठी ४०० मीटरचा खेळाडू मानस शिंदेची निवड

३ ते ८ डिसेंबर २०२६ या कालावधीत ब्राझीलमधील रिओ डी जनेरियो येथे होणाऱ्या ‘आयएसएफ जिम्नासियाड २०२६’ (वर्ल्ड स्कूल गेम्स) मध्ये ४०० मीटर शर्यतीत भारताचे प्रतिनिधित्व करण्यासाठी मानस शिंदेची निवड झाली आहे.

६ ऑक्टोबर २०२६ रोजी गोव्यातील बांबोलिम स्टेडियमवर यासाठीच्या निवड चाचण्या घेण्यात आल्या. मानसने अत्यंत उत्कृष्ट कामगिरी करत ४७.८९ सेकंदांची वेळ नोंदवली. मानस म्हणाला, “माझ्या पहिल्या आंतरराष्ट्रीय स्पर्धेसाठी निवड झाल्यामुळे मी खूप आनंदी आहे. निलेश सर हे माझे प्रशिक्षक आहेत, हे माझे भाग्यच आहे. मला पाठिंबा दिल्याबद्दल मी माझे आई-वडील आणि माझा भाऊ (यश) यांचे आभार मानतो. मी यापुढेही अधिक कठोर परिश्रम करेन.”

प्रशिक्षक निलेश पाटकर म्हणाले, “मानस हा अत्यंत शिस्तप्रिय आणि मेहनती खेळाडू आहे. गेल्या वर्षभरात त्याने आपल्या कामगिरीत चांगली सुधारणा केली आहे. मानस हा माझा सातवा आंतरराष्ट्रीय स्तरावरील खेळाडू ठरला आहे. ‘आयएसएफ जिम्नासियाड’मध्ये भारताचे प्रतिनिधित्व करण्यासाठी निवड झालेला तो ठाणे जिल्ह्यातील पहिलाच पुरुष खेळाडू आहे. ही आपल्या सर्वांसाठी अत्यंत अभिमानाची गोष्ट आहे.”

हे ही वाचा:

चीनचा पुन्हा दावा, ‘संपूर्ण लडाख आमचा’

रेल्वे स्थानकांतील अस्वच्छतेवर पश्चिम रेल्वेचा दणका!

चीनचा पुन्हा दावा, ‘संपूर्ण लडाख आमचा’

राणीनं डाव जिंकला…सोमेश्वर साखर कारखाना निवडणुकीत अजितदादा पॅनल २१-०

या प्रसंगी श्रीमती मीनल पालांडे (उपायुक्त – टीएमसी) आणि श्री. अशोक आहेर (योजना प्रमुख – टीएमसीएपीवाय) यांनी मानस व त्याच्या पालकांचे अभिनंदन केले आणि आगामी स्पर्धेसाठी त्याला शुभेच्छा दिल्या.