ओस्टापेंको-अरेवालो जोडीचे विंबल्डन मिश्र दुहेरीचे विजेतेपद

जेलेना ओस्टापेंको आणि मार्सेलो अरेवालो या जोडीने शानदार पुनरागमन करत विंबल्डन २०२६ स्पर्धेचे मिश्र दुहेरीचे विजेतेपद पटकावले. अंतिम सामन्यात त्यांनी ऑस्ट्रेलियाच्या स्टॉर्म हंटर आणि मार्क पोलमन्स या जोडीचा ४-६, ७-५, ६-२ असा पराभव केला.

सामन्याच्या सुरुवातीला ऑस्ट्रेलियन जोडीने वर्चस्व राखत पहिला सेट ६-४ असा जिंकला. दुसऱ्या सेटमध्येही त्यांनी ३-१ अशी आघाडी घेतली होती. मात्र, ओस्टापेंको आणि अरेवालो यांनी जबरदस्त पुनरागमन करत पुढील आठपैकी सहा गेम जिंकले आणि दुसरा सेट ७-५ असा आपल्या नावावर केला.

निर्णायक तिसऱ्या सेटपूर्वी सेंटर कोर्टचे छत बंद करण्यात आले. त्यानंतर ओस्टापेंको-अरेवालो जोडीने चौथ्या आणि आठव्या गेममध्ये प्रतिस्पर्ध्यांची सर्व्हिस ब्रेक करत ६-२ असा सेट जिंकला आणि १ तास ५६ मिनिटांत सामना तसेच विजेतेपदही खिशात घातले.

हे विजेतेपद ओस्टापेंकोसाठी विशेष ठरले. तिने प्रथमच विंबल्डनचे जेतेपद पटकावले. यापूर्वी ती २०१७ फ्रेंच ओपन एकेरी आणि २०२४ यूएस ओपन महिला दुहेरीची विजेती ठरली होती. आता ती एकेरी, दुहेरी आणि मिश्र दुहेरी अशा तिन्ही प्रकारांत ग्रँडस्लॅम विजेती बनली आहे.

मार्सेलो अरेवालो याच्यासाठीही हा ऐतिहासिक क्षण ठरला. एल साल्वाडोरमधून विंबल्डनचे विजेतेपद जिंकणारा तो पहिलाच खेळाडू ठरला. त्याच्या कारकिर्दीतील हा तिसरा ग्रँडस्लॅम किताब असून यापूर्वी त्याने २०२२ आणि २०२४ मध्ये फ्रेंच ओपन पुरुष दुहेरीचे विजेतेपद पटकावले होते.