२०३६ च्या ऑलिम्पिक आयोजनाचे भारताचे स्वप्न

भारतात क्रीडा क्षेत्रासाठी नव्या सुविधा विकसित केल्या जात असून, युवा खेळाडूंना दर्जेदार प्रशिक्षण आणि आवश्यक पाठबळ दिले जात आहे. भारत २०३६ च्या ऑलिम्पिक स्पर्धांच्या यजमानपदाचे स्वप्न घेऊन पुढे जात आहे. देशातील तरुणांसमोर आता संधींचे अमर्याद दालन खुले होत आहे, असा विश्वास पंतप्रधान नरेंद्र मोदी यांनी व्यक्त केला.

तामिळनाडू दौऱ्यावर असलेल्या पंतप्रधान मोदी यांनी चेन्नई येथील जयगोपाल गारोडिया हिंदू विद्यालय मॅट्रिक्युलेशन उच्च माध्यमिक शाळेच्या सुवर्णमहोत्सवी कार्यक्रमाला उपस्थिती लावली. यावेळी त्यांनी विद्यार्थ्यांशी संवाद साधताना क्रीडा क्षेत्रातील भारताच्या वाढत्या क्षमतेवर आणि युवा पिढीच्या स्वप्नांवर भाष्य केले.

मोदी म्हणाले की, प्रत्येक तरुणाची स्वप्ने आणि प्रतिभा वेगवेगळी असते. अनेक तरुणांना क्रीडा क्षेत्रात करिअर घडवायचे असते. त्यामुळे खेळ केवळ मनोरंजनापुरते मर्यादित न राहता त्यातून करिअरच्या संधी निर्माण व्हाव्यात, यासाठी देश प्रयत्नशील आहे. खेळाडूंना चांगल्या सुविधा, प्रशिक्षण आणि पाठबळ मिळत असून, आंतरराष्ट्रीय क्रीडा क्षेत्रात भारताचा दबदबाही वाढत आहे.

राष्ट्रकुल स्पर्धांनंतर ऑलिम्पिकवर लक्ष

भारताला २०३० च्या राष्ट्रकुल स्पर्धांच्या आयोजनाची संधी मिळाली असून, अहमदाबाद येथे या स्पर्धा होणार आहेत. राष्ट्रकुल स्पर्धांचे हे शताब्दी वर्ष असेल. यापूर्वी भारताने २०१० मध्ये नवी दिल्ली येथे राष्ट्रकुल स्पर्धांचे आयोजन केले होते.

आता भारताचे लक्ष २०३६ च्या ऑलिम्पिक स्पर्धांच्या यजमानपदाकडे आहे. या स्पर्धांच्या आयोजनासाठी आंतरराष्ट्रीय ऑलिम्पिक समितीच्या प्रक्रियेत भारतासह जर्मनी, हंगेरी, कतार, दक्षिण कोरिया, दक्षिण आफ्रिका आणि तुर्की या देशांनी स्वारस्य दाखवले आहे. भारताच्या प्रस्तावासाठी अहमदाबाद या शहराची संभाव्य यजमान शहर म्हणून निवड करण्यात आली आहे.

तरुणांसाठी संधींचे नवे पर्व

आगामी वर्षांत जगातील मोठ्या क्रीडा स्पर्धांचे आयोजन भारतात होण्याच्या दृष्टीने प्रयत्न सुरू आहेत. त्यामुळे भारतीय तरुणांना आपली प्रतिभा दाखवण्यासाठी व्यासपीठ, संधी आणि आवश्यक पाठबळ उपलब्ध होईल, असे मोदी यांनी सांगितले.

तरुण पिढी भारताला जागतिक क्रीडा क्षेत्रात नव्या उंचीवर घेऊन जाईल, असा विश्वासही त्यांनी व्यक्त केला.