गोल्फमध्ये सुवर्ण जिंकणाऱ्या प्रणवीला १० लाखांचे इनाम

इंडियन गोल्फ युनियनच्या (आयजीयू) प्रशासकीय परिषदेने आयची-नागोया एशियन गेम्समध्ये ऐतिहासिक सुवर्णपदक जिंकणाऱ्या प्रणवी उर्सला १० लाख रुपयांचा रोख पुरस्कार देण्याची घोषणा केली आहे. याशिवाय रौप्यपदक जिंकणाऱ्या भारतीय महिला गोल्फ संघातील प्रत्येक सदस्याला प्रत्येकी ३ लाख रुपयांचा रोख पुरस्कार दिला जाणार आहे. महिला संघात प्रणवी उर्ससोबत ऑलिम्पियन अदिती अशोक आणि दीक्षा डागर यांचा समावेश आहे.

आयजीयूचे अध्यक्ष बृजिंदर सिंह यांनी प्रणवी उर्सचे अभिनंदन करताना म्हटले, “तुझी शानदार कामगिरी ही भारतीय गोल्फ आणि इंडियन गोल्फ युनियनमधील आमच्यासाठी अत्यंत अभिमानाची बाब आहे. एशियन गेम्समध्ये सुवर्णपदक जिंकणे ही खूप मोठी उपलब्धी आहे. तुझ्या प्रतिभेचे, कठोर परिश्रमाचे, दृढ निश्चयाचे आणि खेळाप्रती असलेल्या बांधिलकीचे हे प्रतीक आहे.”

हे ही वाचा:

शेतात राबणार रोबोट्स, ड्रोन

भारत-अमेरिका व्यापार कराराला पुन्हा ब्रेक

शहीदपत्नी प्रियांका सक्सेना पुन्हा भारतीय हवाई दलात रुजू

भारत-अमेरिका व्यापार कराराला पुन्हा ब्रेक

ते पुढे म्हणाले, “इंडियन गोल्फ युनियनच्या वतीने तुम्हाला हे सांगताना मला आनंद होत आहे की, प्रशासकीय परिषदेने तुमच्या सुवर्णपदक विजेत्या कामगिरीसाठी १० लाख रुपयांच्या रोख पुरस्काराला मंजुरी दिली आहे. याशिवाय, आयजीयूने महिला गोल्फ संघातील प्रत्येक सदस्याला रौप्यपदकासाठी ३ लाख रुपये देण्याची घोषणा केली आहे.”

बृजिंदर सिंह यांनी सांगितले, “भारतीय गोल्फला मोठा सन्मान मिळवून देण्यासाठी तुम्ही दिलेल्या शानदार योगदानाबद्दल आणि कामगिरीबद्दल कृतज्ञता व्यक्त करण्याचा हा आमचा एक छोटासा प्रयत्न आहे.”

प्रणवी उर्सच्या विजयामुळे एशियन गेम्समधील गोल्फच्या वैयक्तिक सुवर्णपदकासाठी भारताचा २४ वर्षांचा प्रतीक्षा काळ संपला आहे. यापूर्वी बुसान येथे २००२ मध्ये शिव कपूरने पुरुषांच्या वैयक्तिक स्पर्धेत सुवर्णपदक जिंकले होते. हेच भारताचे एशियन गेम्समधील गोल्फमधील मागील वैयक्तिक सुवर्णपदक होते.

यापूर्वी अदिती अशोकने हांगझोऊ येथे झालेल्या २०२३च्या एशियन गेम्समध्ये रौप्यपदक जिंकले होते. प्रणवी उर्सला त्या स्पर्धेत चौथ्या स्थानावर समाधान मानावे लागले होते.

प्रणवीचे हे सुवर्णपदक एशियन गेम्समधील गोल्फमध्ये भारताचे चौथे सुवर्णपदक ठरले आहे. भारताला गोल्फमधील पहिले एशियन गेम्स सुवर्णपदक १९८२ मध्ये नवी दिल्ली येथे मिळाले होते. लक्ष्मण सिंह यांनी ऋषी नारायण, अमित लूथरा आणि राजीव मोहता यांच्यासोबत पुरुषांच्या सांघिक स्पर्धेत सुवर्णपदक जिंकले होते.