फिफा विश्वचषक २०२६ मधील डीआर काँगोविरुद्धच्या सामन्यात पोर्तुगालला १-१ अशी बरोबरी स्वीकारावी लागल्यानंतर स्टार फुटबॉलपटू क्रिस्टियानो रोनाल्डो याच्यावर टीकेची झोड उठली आहे. मात्र, पोर्तुगालचा बचावपटू रुबेन डायस याने आपल्या कर्णधाराच्या पाठीशी ठामपणे उभे राहत, पराभव किंवा खराब कामगिरीसाठी केवळ एका खेळाडूला जबाबदार धरणे योग्य नसल्याचे स्पष्ट केले.
डीआर काँगोविरुद्धच्या सामन्यात रोनाल्डोला २५ वेळा चेंडू मिळाला, मात्र त्याला एकही अचूक शॉट, असिस्ट किंवा प्रभावी ड्रिबल करता आले नाही. त्यामुळे त्याच्यावर टीकेचा भडिमार सुरू झाला. तरीही डायसने रोनाल्डोवरील विश्वास कायम असल्याचे सांगितले.
प्रसारमाध्यमांशी बोलताना डायस म्हणाला, “क्रिस्टियानो रोनाल्डो अशा दबावाला सरावलेले आहेत. क्लब फुटबॉल, राष्ट्रीय संघ, युरो स्पर्धा किंवा विश्वचषक अशा प्रत्येक मोठ्या मंचावर त्यांनी हे अनुभवले आहे. अशा स्पर्धांमध्ये सर्व काही नेहमी परिपूर्ण होईलच असे नाही.”
त्याने पुढे सांगितले की, “टीका केवळ एका खेळाडूची नसते. रोनाल्डो सर्वाधिक चर्चेत असल्याने त्यांच्यावर अधिक लक्ष केंद्रित होते. पण मैदानावरील कामगिरी ही संपूर्ण संघाची जबाबदारी असते.”
डायसने स्पष्ट केले की, बाहेरून होणाऱ्या टीकेचा संघावर कोणताही परिणाम होत नाही. “हे खेळाचा भाग आहे. एखादा सामना अपेक्षेप्रमाणे झाला नाही तर अशा चर्चा होणारच. आम्ही त्या गोंगाटापासून दूर राहून पुढील सामन्यावर लक्ष केंद्रित करत आहोत,” असे तो म्हणाला.
४१ वर्षीय रोनाल्डो आपल्या कारकिर्दीतील सहाव्या विश्वचषकात खेळत आहेत. पोर्तुगालचा पुढील सामना २३ जून रोजी उझबेकिस्तानविरुद्ध होणार असून, त्या सामन्यात संघाकडून दमदार पुनरागमनाची अपेक्षा व्यक्त केली जात आहे.
