फिफा विश्वचषक २०२६ मध्ये स्पेनने आपल्या विजेतेपदाच्या दाव्याला आणखी बळकटी देत बेल्जियमवर २-१ असा थरारक विजय मिळवला आणि उपांत्य फेरीत धडक मारली. अखेरच्या काही मिनिटांपर्यंत रंगलेल्या या चुरशीच्या सामन्यात मिकेल मेरिनोने ८८व्या मिनिटाला केलेल्या निर्णायक गोलमुळे स्पेनने विजयावर शिक्कामोर्तब केले. या विजयासह २०१० नंतर प्रथमच स्पेनने विश्वचषकाच्या उपांत्य फेरीत स्थान मिळवले असून आता त्यांचा सामना बलाढ्य फ्रान्सशी होणार आहे.
सामन्याच्या सुरुवातीपासूनच स्पेनने चेंडूवरील नियंत्रण राखत आक्रमक खेळ केला. त्याचा फायदा त्यांना पहिल्या हाफमध्ये मिळाला, जेव्हा फॅबियन रुईझने अचूक फिनिशिंग करत स्पेनला १-० अशी आघाडी मिळवून दिली. मात्र बेल्जियमने हार मानली नाही. दुसऱ्या हाफमध्ये चार्ल्स डी केटेलारेने शानदार गोल करत सामना १-१ असा बरोबरीत आणला आणि सामना अधिक रंगतदार झाला.
हे ही वाचा:
आषाढी वारी हायटेक! संपर्कासाठी प्रथमच ‘बीबीपीपीडीआर’ प्रणाली
प्रेयसीवर संशयातून प्रियकराने केली निर्घृण हत्या
दहिसरच्या खाणीत बुडून दोन तरुणांचा दुर्दैवी अंत
जोकोविचचे २५व्या ग्रँडस्लॅमचे स्वप्न पुन्हा भंग
बरोबरीनंतर दोन्ही संघांनी विजयासाठी जोरदार प्रयत्न सुरू ठेवले. स्पेनने सातत्याने बेल्जियमच्या बचावफळीवर दबाव निर्माण केला. अखेर ८८व्या मिनिटाला पॉ क्युबार्सीच्या प्रयत्नावर बेल्जियमचा गोलरक्षक चेंडू पूर्णपणे रोखू शकला नाही. याच संधीचा फायदा घेत मिकेल मेरिनोने चेंडू जाळ्यात धाडला आणि स्पेनला २-१ अशी निर्णायक आघाडी मिळवून दिली. उर्वरित वेळेत बेल्जियमने बरोबरीसाठी आक्रमणांची मालिका सुरू ठेवली, मात्र स्पेनच्या बचावफळीने कोणतीही चूक न करता विजय निश्चित केला.
या स्पर्धेत सुपर-सब म्हणून मैदानात उतरलेल्या मिकेल मेरिनोने पुन्हा एकदा संघाचा तारणहार ठरत निर्णायक गोल केला. यापूर्वीही त्याने बाद फेरीत विजयी गोल नोंदवला होता. दुसरीकडे, लॅमिन यामाल, पॉ क्युबार्सी आणि फॅबियन रुईझ या युवा खेळाडूंनीही उत्कृष्ट खेळ करत स्पेनच्या विजयात महत्त्वाची भूमिका बजावली.
या दमदार विजयामुळे स्पेनचा आत्मविश्वास कमालीचा वाढला आहे. आता उपांत्य फेरीत त्यांच्यासमोर फ्रान्सचे कडवे आव्हान असेल. युरोपमधील दोन बलाढ्य संघांमध्ये होणाऱ्या या लढतीकडे जगभरातील फुटबॉलप्रेमींचे लक्ष लागले असून विश्वचषकाच्या अंतिम फेरीत प्रवेश मिळवण्यासाठी दोन्ही संघ सर्वस्व पणाला लावतील.
