जोशना-सेंथिलकुमार यांची दुहेरी कमाल!

तिसऱ्या नेशनल डबल्स स्क्वॅश चॅम्पियनशिपमध्ये वेलवन सेंथिलकुमार आणि जोशना चिनप्पा यांनी शानदार कामगिरी करत दुहेरी विजेतेपद पटकावले. दोघांनी आपल्या जोडीदारांसह पुरुष आणि महिला दुहेरी गटात किताब जिंकला, तसेच एकत्र खेळताना मिश्र दुहेरीचे विजेतेपदही आपल्या नावावर केले.

पुरुष दुहेरीच्या अंतिम सामन्यात अव्वल मानांकित अभय सिंह आणि वेलवन सेंथिलकुमार जोडीने राहुल बैथा आणि सूरज कुमार चांद या दुसऱ्या मानांकित जोडीचा ११-८, ११-५ असा पराभव करत सलग तिसऱ्यांदा किताब जिंकला.

मिश्र दुहेरीच्या अंतिम फेरीत सेंथिलकुमार आणि जोशना चिनप्पा यांनी अभय सिंह आणि राधिका सीलन या जोडीवर ११-७, ११-९ असा विजय मिळवत विजेतेपद पटकावले.

महिला दुहेरीच्या अंतिम सामन्यात जोशना चिनप्पा आणि राधिका सीलन यांनी जेनेट विधी आणि पूजा आरती यांचा ११-८, ११-४ असा पराभव केला.

याआधी उपांत्य फेरीत अभय सिंह आणि सेंथिलकुमार यांनी रवि दीक्षित आणि विकास मेहरा यांना ११-१, ११-६ अशा एकतर्फी सामन्यात हरवत अंतिम फेरीत प्रवेश केला होता. दुसऱ्या उपांत्य फेरीत राहुल बैथा आणि सूरज कुमार चांद यांनी गुहान सेंथिलकुमार आणि संदेश पीआर यांच्यावर ११-८, ११-७ असा विजय मिळवला होता.