सीजेपीच्या आंदोलनाच्या पार्श्वभूमीवर लखनऊमध्ये हाय अलर्ट

दिल्लीतील सीजेपीच्या (CJP) विरोध प्रदर्शनाच्या पार्श्वभूमीवर उत्तर प्रदेशची राजधानी लखनऊमध्ये हाय अलर्ट जारी करण्यात आला आहे. शहरातील कायदा आणि सुव्यवस्था कायम राखण्यासाठी पोलिस प्रशासनाने सुरक्षा व्यवस्था अधिक कडक केली असून, महत्त्वाच्या ठिकाणी पोलिसांचा बंदोबस्त वाढवण्यात आला आहे. लखनऊचे संयुक्त पोलीस आयुक्त (कायदा व सुव्यवस्था) बबलू कुमार यांनी सर्व पोलीस ठाण्यांचे प्रभारी अधिकारी, सहाय्यक पोलीस आयुक्त (एसीपी) आणि पोलीस उपायुक्त (डीसीपी) यांना सतर्क राहण्याच्या सूचना दिल्या आहेत. हजरतगंज, विधानसभा परिसर, जनभवन आणि लोकभवन परिसरात विशेष खबरदारी घेतली जात असून, रेल्वे स्थानके आणि बस स्थानकांवरही प्रवाशांची तपासणी केली जात आहे.

या आंदोलनाच्या पार्श्वभूमीवर पोलिसांनी गुप्तचर यंत्रणा आणि स्थानिक पोलीस पथकांना सक्रिय केले आहे. संयुक्त पोलीस आयुक्त बबलू कुमार यांनी दिलेल्या माहितीनुसार, स्थानिक गुप्तचर विभाग आणि पोलीस संयुक्तपणे आंदोलनाशी संबंधित माहिती गोळा करत आहेत. सोशल मीडियावरील संदेश आणि घडामोडींवरही सातत्याने लक्ष ठेवले जात आहे. क्षेत्रीय अधिकाऱ्यांकडून मिळणाऱ्या माहितीच्या आधारे आवश्यक ती कारवाई करण्याचे निर्देश देण्यात आले आहेत. शहरात कोणतीही अनुचित घटना घडू नये, तसेच सार्वजनिक शांतता आणि वाहतूक व्यवस्थेत अडथळे निर्माण होऊ नयेत, यासाठी पोलीस यंत्रणा सज्ज ठेवण्यात आली आहे.
हे ही वाचा:
सोमवारी काँग्रेसचा दिल्लीत मोर्चा

मध्य रेल्वेचा ‘स्वच्छता रथ’ धावला; १.६८ लाख किलो कचऱ्याची विल्हेवाट

दरम्यान, या आंदोलनावरून उत्तर प्रदेशातील राजकीय वातावरणही तापले आहे. उत्तर प्रदेश सरकारमधील मंत्री नरेंद्र कश्यप यांनी आंदोलनातील मागण्यांवर टीका करत काँग्रेस आणि समाजवादी पक्षावर राजकीय हेतूने आंदोलनाला पाठिंबा देत असल्याचा आरोप केला. भाजपचे प्रदेशाध्यक्ष पंकज चौधरी यांनीही आंदोलनकर्त्यांकडून घटनात्मक संस्थांवर प्रश्न उपस्थित केले जात असल्याचे म्हटले. दुसरीकडे, आंदोलनकर्त्यांच्या मागण्या आणि निवडणूक प्रक्रियेच्या निष्पक्षतेबाबत उपस्थित केलेले प्रश्न यांमुळे या आंदोलनाकडे देशभराचे लक्ष लागले आहे. त्यामुळे दिल्लीतील आंदोलनाचा संभाव्य परिणाम लक्षात घेऊन लखनऊमध्ये सुरक्षा यंत्रणांकडून परिस्थितीवर बारकाईने लक्ष ठेवले जात आहे.