कॅप्टन स्मित माछर यांना ‘विशिष्ट गुजरात गरिमा पुरस्कार’

दुबईहून तेल अवीवला जाणाऱ्या फ्लायदुबईच्या विमानातील मोठी दुर्घटना टाळण्यात महत्त्वाची भूमिका बजावणारे कॅप्टन स्मित माछर यांच्यावर जगभरातील नेत्यांकडून कौतुकाचा वर्षाव होत आहे. अशातच स्मित यांना गुजरात सरकारकडून ‘विशिष्ट गुजरात गरिमा पुरस्कार’ देण्यात येणार आहे. मुख्यमंत्री भूपेंद्र पटेल यांनी गुरुवारी ही घोषणा केली. राज्य सरकारने त्यांच्यासाठी २५ लाख रुपयांच्या रोख बक्षिसाचीही घोषणा केली आहे.

मुख्यमंत्री पटेल यांनी सांगितले की, कॉकपिटमध्ये झालेल्या हल्ल्यात गंभीर जखमी होऊन रक्तस्त्राव होत असतानाही कॅप्टन माछर यांनी असाधारण धैर्य दाखवले. विमानातील सर्व १७४ प्रवाशांचे प्राण वाचवण्यात त्यांनी महत्त्वाची भूमिका बजावली. सोशल मीडिया प्लॅटफॉर्म ‘एक्स’वरील पोस्टमध्ये पटेल यांनी म्हटले की, जगभरातून कॅप्टन माछर यांच्या धैर्याला सलाम केला जात आहे. त्यांचे पाऊल अत्यंत प्रेरणादायी आणि प्रशंसनीय असल्याचे त्यांनी सांगितले. गुजराती मुळाचे कॅप्टन माछर यांनी आपल्या धाडसाने गुजरात आणि देशाचा गौरव वाढवला आहे, असेही मुख्यमंत्र्यांनी म्हटले.

मुख्यमंत्री म्हणाले, “त्यांच्या असाधारण धाडस आणि मानवतेच्या या कार्याचा सन्मान म्हणून गुजरात सरकार कॅप्टन स्मित मच्छार यांना ‘विशिष्ट गुजरात गरिमा पुरस्कार’ देईल.” कॅप्टन माछर लवकर बरे व्हावेत, यासाठी संपूर्ण गुजरात प्रार्थना करत असल्याचेही त्यांनी सांगितले.

हे ही वाचा:

तृणमूलच्या चार बँक खात्यांवरील फ्रीज कायम

तीस्ता नदीवरील १,१७५ कोटींच्या पुल प्रकल्पाला मंजुरी

भारत-फ्रान्स सागरी सराव ‘वरुण’ला सुरुवात

दुबईत स्मित यांच्या कुटुंबीयांची भारतीय राजदूतांनी घेतली भेट

गुजरातचे उपमुख्यमंत्री हर्ष संघवी यांनीही ‘एक्स’वर पुरस्काराची घोषणा केली. हल्ल्यात गंभीर जखमी होऊनही कॅप्टन मच्छार यांनी असाधारण धैर्य दाखवले आणि १७४ जणांचे प्राण वाचवले, असे त्यांनी म्हटले. गुजरातला आपल्या या “बहादूर मुलाचा” अभिमान असल्याचेही त्यांनी सांगितले.