कंगना रनौतच्या ‘जनरेशन गटर’ या वक्तव्यावरून सुरू झालेला वाद आता आणखी रंगला आहे. योगगुरू बाबा रामदेव यांनी कंगनाच्या वक्तव्यावर नाराजी व्यक्त करत तरुण पिढीला ‘गटर’ म्हणणे योग्य नसल्याचे म्हटले होते. त्यांच्या या टीकेनंतर कंगना रनौतने सोशल मीडियावरून रामदेव यांना थेट प्रत्युत्तर देत हा वाद पुन्हा चर्चेत आणला.
बाबा रामदेव यांनी कंगनाच्या वक्तव्यावर प्रतिक्रिया देताना, तरुण पिढीबाबत अशा प्रकारची भाषा वापरणे चुकीचे असल्याचे म्हटले. समाजातील नव्या पिढीला प्रोत्साहन देण्याऐवजी तिच्याबद्दल नकारात्मक टिप्पणी करणे योग्य नसल्याचे त्यांनी सांगितले. त्यांच्या या वक्तव्यामुळे कंगना आणि रामदेव यांच्यातील शाब्दिक वादाला सुरुवात झाली.
हे ही वाचा:
१८ दिवसांत साखर तब्बल १८ रुपयांनी महागली
सिंधूच्या कठीण काळात विराट ठरला ‘गेमचेंजर’
अमेरिकेचा दावा…जम्मू-काश्मीर भारताचा महत्त्वाचा भाग!
…म्हणून पीएम केअर फंडातून खर्च झाले फक्त ८७ लाख रु.!
कंगनाने इन्स्टाग्राम स्टोरीच्या माध्यमातून रामदेव यांच्या टीकेला जोरदार उत्तर दिले. आपल्या वैयक्तिक आयुष्यावर किंवा चारित्र्यावर भाष्य करण्याचा अधिकार कोणालाही नसल्याचे तिने स्पष्ट केले. तिने रामदेव यांना त्यांच्या वक्तव्यावरून बोचरा टोला लगावत, आपल्या तरुणपणाबाबत किंवा वैयक्तिक आयुष्याबाबत ‘दिवास्वप्न’ पाहू नका, अशा आशयाची टीका केली.
कंगनाने यावेळी बाबा रामदेव यांच्या पतंजलीशी संबंधित जुन्या वादाचाही उल्लेख केला. पतंजलीच्या उत्पादनांच्या जाहिराती आणि त्यातील दाव्यांवरून सर्वोच्च न्यायालयाने केलेल्या निरीक्षणांचा संदर्भ देत तिने रामदेव यांच्यावर पलटवार केला. आपल्या चारित्र्याबाबत बोलण्यापूर्वी स्वतःच्या भूतकाळाकडे पाहावे, असा अप्रत्यक्ष संदेश कंगनाने दिला.
दरम्यान, ‘जनरेशन गटर’ या वक्तव्यावरून कंगनावर यापूर्वीही टीका झाली होती. मात्र, तिचा रोख संपूर्ण Gen Z पिढीकडे नसून विशिष्ट प्रकारच्या सोशल मीडिया ट्रेंड आणि आंदोलनांमध्ये सहभागी असलेल्या काही लोकांकडे होता, असे तिने नंतर स्पष्ट केले होते. आता बाबा रामदेव यांच्या प्रतिक्रियेमुळे हा जुना वाद पुन्हा पेटला असून, कंगना आणि रामदेव यांच्यातील शाब्दिक संघर्षाची सोशल मीडियावर जोरदार चर्चा सुरू आहे.