जम्मू-काश्मीर: रियासीमध्ये भूस्खलनात ७, तर रामबनमध्ये ढगफुटीत ४ जणांचा मृत्यू!

जम्मू आणि काश्मीर केंद्रशासित प्रदेशाच्या मोठ्या भागात मुसळधार पावसामुळे भूस्खलन आणि अचानक आलेल्या पुरात किमान ११ जणांचा मृत्यू झाला आहे, अशी माहिती अधिकाऱ्यांनी दिली. रियासी जिल्ह्यात, माहोर भागात भूस्खलनात सात जणांचा मृत्यू झाला आहे. बचाव पथकांनी आतापर्यंत ढिगाऱ्यातून पाच मृतदेह बाहेर काढले आहेत, तर अनेक जण अडकल्याची भीती आहे. शोध मोहीम अजूनही सुरू आहे.

रामबनमध्ये, शुक्रवारी राजगडच्या उंच भागात ढगफुटीमुळे झालेल्या पूरपरिस्थितीत चार जणांचा मृत्यू झाला आणि चार जण बेपत्ता झाले. अधिकाऱ्यांच्या म्हणण्यानुसार, पाण्याच्या प्रवाहाणे घरे वाहून गेली, अनेक इमारतींचे नुकसान झाले आणि काही पूर्णपणे वाहून गेल्या. बचाव आणि मदत कार्य सुरू आहे.

केंद्रीय मंत्री जितेंद्र सिंह यांनी रामबनमधील घटनेची पुष्टी केली आणि सांगितले की, बाधितांना सर्वतोपरी मदत केली जात आहे. “आत्ताच डीसी रामबन मोहम्मद अल्यास खान यांच्याशी बोललो. राजगड परिसरात ढगफुटी झाल्याने चार जणांचा दुर्दैवी मृत्यू झाला. पाचवा बेपत्ता आहे आणि शोध सुरू आहे. दरम्यान, कोणीही जखमी झालेले नाही. बचाव कार्य सुरू आहे. शक्य तितकी मदत पुरवली जात आहे. मी सतत संपर्कात आहे,” असे सिंह यांनी एक्सवरील पोस्टमध्ये म्हटले आहे. रामबन हे श्रीनगरपासून सुमारे १३६ किमी अंतरावर आहे.

जम्मू आणि काश्मीरमध्ये गेल्या आठवडाभरापासून मुसळधार पाऊस पडत आहे, नद्या दुथडी भरून वाहत आहेत, पुराच्या पाण्याने मार्गातील सर्व काही वाहून गेले आहे आणि दगड, झाडे आणि खडक उतारावरून कोसळत आहेत. 

या आठवड्याच्या सुरुवातीला, जम्मूच्या कटरा येथील वैष्णोदेवी मंदिराजवळ भूस्खलन होऊन ३१ जणांचा मृत्यू झाला आणि अनेक जण बेपत्ता झाले. त्रिकुटा टेकडीवरील माता वैष्णोदेवी मंदिराकडे जाणाऱ्या मार्गावर दगड कोसळल्याने मार्ग बंद आहे. तेव्हापासून यात्रा स्थगित करण्यात आली होती.

हे ही वाचा : 

बिहारमधील SIR प्रोजेक्ट पारदर्शक, मूड ऑफ द नेशनचे नट

आंदोलनाचा खेळ होतो, मुंबईकरांचा जीव जातो!

जैशचे दहशतवादी बिहारमध्ये घुसले?, नेपाळ म्हणाले- ते तर मलेशियाला गेले.

महुआ मोईत्रांचे डोके फिरले; म्हणाल्या अमित शहांचे डोके छाटा!

हवामान खात्याने शुक्रवारी पूंछ, रियासी, राजौरी, किश्तवार आणि उधमपूर येथे वादळ आणि विजांचा इशारा देत पिवळा इशारा जारी केला आहे. शनिवार आणि रविवारी पूंछ, किश्तवार, जम्मू, रामबन आणि उधमपूर येथे जोरदार पावसाची शक्यता दर्शविणारा ऑरेंज अलर्ट जारी करण्यात आला आहे.