पंतप्रधान नरेंद्र मोदी यांची ‘जीएसटी बचत उत्सवाची घोषणा’

पंतप्रधान नरेंद्र मोदी यांनी राष्ट्राला उद्देशून केलेल्या भाषणात जीएसटी सुधारणांचे महत्त्व अधोरेखित करत सांगितले की, या सुधारणांमुळे भारताच्या विकासगाथेला नव्या उंचीवर नेले जाईल. ते म्हणाले, “२०१४ मध्ये देशवासीयांनी आम्हाला सेवा करण्याची संधी दिली. त्या वेळी आम्ही सार्वजनिक हित आणि राष्ट्रीय हित लक्षात घेऊन जीएसटीला आमचे प्राधान्य मानले. सर्व राज्यांना विश्वासात घेऊन, स्वतंत्र भारतातील सर्वात मोठी करसुधारणा आम्ही यशस्वीपणे राबवली.”

“केंद्र आणि राज्यांच्या एकत्रित प्रयत्नांमुळे देश डझनभर करांच्या गुंतागुंतीतून मुक्त झाला आणि ‘एक राष्ट्र, एक कर’ हे स्वप्न साकार झालं.” मोदींनी यावेळी असेही स्पष्ट केले की, “सुधारणा या सतत सुरू राहणाऱ्या प्रक्रिया असतात. काळ बदलतो, देशाच्या गरजा बदलतात — त्यामुळे पुढील पिढीच्या गरजांना अनुसरून नवी सुधारणा करणे तितकेच महत्त्वाचे ठरते. म्हणूनच नवीन जीएसटी सुधारणा लागू केल्या जात आहेत.” या नव्या उपाययोजनांमुळे व्यवसाय करणे सुलभ होईल, ग्राहकांना दिलासा मिळेल आणि अर्थव्यवस्थेला नवा बळ मिळेल, अशी आशा त्यांनी व्यक्त केली.