दक्षिण भारतीय चित्रपटसृष्टीतील ज्येष्ठ आणि दिग्गज पार्श्वगायिका एस. जानकी यांचे वयाच्या ८८व्या वर्षी निधन झाले. म्हैसूरमधील रुग्णालयात वयोमानानुसार उद्भवलेल्या आरोग्याच्या समस्यांवर उपचार सुरू असताना त्यांना हृदयविकाराचा झटका आला आणि त्यांनी अखेरचा श्वास घेतला. त्यांच्या निधनाने भारतीय संगीतविश्वावर शोककळा पसरली असून अनेक कलाकार, राजकीय नेते आणि चाहत्यांनी त्यांना भावपूर्ण श्रद्धांजली वाहिली आहे.
‘दक्षिणेची कोकिळा’ म्हणून ओळखल्या जाणाऱ्या एस. जानकी यांनी तब्बल सहा दशकांहून अधिक काळ आपल्या मधुर आवाजाने श्रोत्यांवर अधिराज्य गाजवले. तमिळ, तेलुगू, मल्याळम, कन्नड, हिंदीसह जवळपास २० भारतीय भाषांमध्ये त्यांनी गायन केले. त्यांच्या कारकिर्दीत ४८ हजारांहून अधिक गाणी रेकॉर्ड झाली असून, भावगीत, भक्तिगीते, चित्रपटगीते आणि विविध संगीतप्रकारांमध्ये त्यांनी आपला वेगळा ठसा उमटवला.
हे ही वाचा:
वाळवंटातला मैलाचा दगड; तेल शुद्ध तुझं, गोष्ट आहे पचपद्राची
अल निनोमुळे राज्यात पुन्हा पावसाची प्रतीक्षा
नेपाळ दौऱ्यावर इंडिया ‘ए’; BCCI ने जाहीर केले वेळापत्रक
लॉर्ड्स मार्क इंडस्ट्रीजचे ‘बीएसई’वर शानदार पदार्पण
एस. जानकी यांच्या नावावर अनेक मानाचे पुरस्कार आहेत. त्यांना सर्वोत्कृष्ट पार्श्वगायिकेचा राष्ट्रीय चित्रपट पुरस्कार चार वेळा मिळाला, तर विविध राज्य सरकारांचे ३० हून अधिक चित्रपट पुरस्कारही त्यांनी पटकावले. त्यांच्या गायकीतील भावस्पर्शी अभिव्यक्ती, शब्दोच्चारांवरील पकड आणि प्रत्येक गाण्यातील सहजता यामुळे त्या भारतीय संगीतविश्वातील सर्वोच्च गायिकांपैकी एक मानल्या जात होत्या.
त्यांच्या आयुष्यातील एक महत्त्वाचा निर्णयही कायम चर्चेत राहिला. केंद्र सरकारने त्यांना पद्मभूषण पुरस्कार जाहीर केला होता. मात्र, आपल्या योगदानाची दखल खूप उशिरा घेतल्याची भावना व्यक्त करत त्यांनी हा सन्मान स्वीकारण्यास नम्रपणे नकार दिला होता. पुरस्कारापेक्षा रसिकांचे प्रेम आणि मान्यता अधिक मौल्यवान असल्याचे त्यांनी त्यावेळी स्पष्ट केले होते.
एस. जानकी यांच्या निधनानंतर अभिनेता रजनीकांत, कमल हासन, चिरंजीवी, तसेच अनेक नामवंत कलाकारांनी त्यांच्या आठवणींना उजाळा देत भारतीय संगीतविश्वासाठी ही भरून न निघणारी हानी असल्याचे म्हटले आहे. राष्ट्रपती द्रौपदी मुर्मू यांनीही त्यांच्या दीर्घ आणि समृद्ध संगीतप्रवासाला आदरांजली अर्पण केली.
एस. जानकी यांचा आवाज आजही लाखो संगीतप्रेमींच्या मनात जिवंत आहे. अनेक पिढ्यांना भावनिक स्पर्श करणाऱ्या त्यांच्या गीतांचा वारसा कायम स्मरणात राहील. त्यांच्या निधनाने भारतीय चित्रपटसंगीतातील एक सुवर्णपर्व संपुष्टात आले असले, तरी त्यांच्या स्वरांचा गोडवा पुढील अनेक दशकांपर्यंत रसिकांच्या हृदयात कायम घुमत राहील.