अमरावती शहरातील कांतानगर परिसरात मध्यरात्री घडलेली चोरीची घटना संपूर्ण शहरासाठी धक्कादायक ठरली आहे. जे न्यायाधीश नागरिकांना न्याय मिळवून देण्यासाठी दिवस-रात्र काम करतात, त्यांच्याच घरांवर चोरट्यांनी डल्ला मारल्याने कायदा आणि सुव्यवस्थेवर गंभीर प्रश्नचिन्ह निर्माण झाले आहे. ही घटना एखाद्या सामान्य नागरिकाच्या घरापुरती मर्यादित नसून थेट पाच न्यायाधीश आणि चार न्यायालयीन कर्मचाऱ्यांच्या निवासस्थानी घडल्यामुळे तिचे गांभीर्य अधिक वाढले आहे.
पोलीस तपासानुसार, ही चोरी मध्यरात्री सुमारे दोनच्या सुमारास झाली. चोरट्यांनी नलदमयंती आणि शहानूर अपार्टमेंट्समधील न्यायाधीशांच्या घरांना लक्ष्य केले. संबंधित कुटुंबीय घराबाहेर असल्याची संधी साधून चोरांनी घरांचे कुलूप तोडले आणि लाखो रुपये किमतीचा मुद्देमाल लंपास केला. या घटनेची माहिती मिळताच पोलिसांनी घटनास्थळी धाव घेत पंचनामा केला आणि तपासाला सुरुवात केली.
हे ही वाचा:
AI आणि डेटा सेंटरमुळे वीज क्षेत्राला मिळणार ‘ऊर्जा’
भारत ऊर्जा खरेदीचा निर्णय राजकीय दबावाला बळी पडून घेत नाही!
बांगलादेशकडून पंतप्रधान मोदींना शपथविधीचे निमंत्रण
सीसीटीव्ही फुटेजमध्ये तीन संशयित चोरटे दिसत असल्याचे पोलिसांनी सांगितले आहे. त्यांच्या हालचाली संशयास्पद असल्याचे स्पष्ट झाले असून त्यांचा शोध घेण्यासाठी विशेष पथक नेमण्यात आले आहे. मात्र, रात्रीच्या वेळी सुरक्षा व्यवस्था असतानाही ही चोरी कशी घडली, हा प्रश्न नागरिक उपस्थित करीत आहेत. स्थानिकांनी याबाबत नाराजी व्यक्त करत पोलिस गस्त आणि बंदोबस्त अधिक मजबूत करण्याची मागणी केली आहे.
या घटनेमुळे नागरिकांमध्ये भीतीचे वातावरण निर्माण झाले आहे. काही दिवसांपूर्वीच अमरावतीत एका सुवर्णकाराला लुटल्याची घटना ताजी असताना आता न्यायाधीशांच्या घरांवर चोरी झाल्याने गुन्हेगारी वाढत असल्याची भावना बळावली आहे. कायद्याचे रक्षण करणाऱ्यांनाच जर सुरक्षितता नसेल, तर सामान्य नागरिकांचे काय, असा सवाल सर्वसामान्य लोक करत आहेत.
सामाजिक कार्यकर्त्यांनीही या घटनेवर तीव्र प्रतिक्रिया दिली आहे. “न्याय देणाऱ्यांनाच आता न्याय मागण्याची वेळ आली आहे,” असे मत व्यक्त करत त्यांनी प्रशासनाने तातडीने कडक पावले उचलावीत, अशी मागणी केली आहे. ही घटना केवळ आर्थिक नुकसानापुरती मर्यादित नसून लोकांच्या मनातील कायदा-व्यवस्थेवरील विश्वासालाच तडा देणारी असल्याचे मत व्यक्त होत आहे.
सध्या पोलिसांनी तपासाला वेग दिला असून सीसीटीव्ही फुटेज, तांत्रिक माहिती आणि स्थानिक चौकशीच्या आधारे आरोपींना पकडण्याचे प्रयत्न सुरू आहेत. मात्र, या प्रकरणात लवकरात लवकर दोषींना अटक करून कठोर कारवाई होणे गरजेचे असल्याची भावना सर्वत्र व्यक्त होत आहे. न्यायव्यवस्थेचा सन्मान आणि सुरक्षितता राखण्यासाठी ही घटना प्रशासनासाठी मोठी कसोटी ठरणार आहे.
