नाशिकमध्ये भीषण अपघात; विहिरीत गाडी कोसळून सहा विद्यार्थ्यांसह ९ जणांचा मृत्यू

नाशिक जिल्ह्यातील दिंडोरी तालुक्यात घडलेल्या भीषण अपघाताने संपूर्ण महाराष्ट्र हादरला आहे. एका कारने नियंत्रण सुटल्यामुळे रस्त्यालगतच्या पाण्याने भरलेल्या विहिरीत कोसळत एकाच कुटुंबातील ९ जणांचा दुर्दैवी मृत्यू झाला. या दुर्घटनेत लहान मुलांचाही समावेश असल्याने परिसरात शोककळा पसरली आहे. ही घटना शुक्रवारी (३ एप्रिल) रात्री सुमारे १० वाजण्याच्या सुमारास दिंडोरी तालुक्यातील शिवाजीनगर परिसरात घडली. मृत सर्वजण दर्गुडे कुटुंबातील असून ते एका कार्यक्रमावरून परतत होते. कार (मारुती XL6) रस्त्यावरून जात असताना चालकाचे नियंत्रण सुटले आणि वाहन थेट रस्त्याच्या कडेला असलेल्या विहिरीत जाऊन पडले.
हे ही वाचा: 

पश्चिम आशियातील तणावातही सातवा LPG टँकर भारताकडे

१५ दिवसात ‘धुरंधर-२’ने कमावले १५०० कोटी!

पाकिस्तानच्या खैबर पख्तूनख्वामध्ये पोलीस ठाण्यावर आत्मघाती हल्ला

“नाही म्हणजे नाही!” ६ कोटी भरण्यासाठी अतिरिक्त वेळ मिळणार नाही

अपघात इतका भीषण होता की गाडीत बसलेले सर्वजण विहिरीतील पाण्यात अडकले. स्थानिक नागरिक आणि पोलिसांनी तत्काळ घटनास्थळी धाव घेत बचावकार्य सुरू केले. त्यानंतर आपत्ती व्यवस्थापन पथक आणि एनडीआरएफची मदत घेण्यात आली. मात्र, गाडी बाहेर काढेपर्यंत सर्वांचा मृत्यू झाला होता.

या अपघातात मृत्यू पावलेल्यांमध्ये ५ ते ६ लहान मुलांचा समावेश असल्याची माहिती समोर आली आहे. एका ७ वर्षांच्या मुलीचाही यात मृत्यू झाला. कुटुंबातील पुरुष, महिला आणि मुलं—अशा सर्व वयोगटातील सदस्यांचा यात अंत झाला.

बचावकार्य रात्री उशिरापर्यंत सुरू होते. क्रेनच्या सहाय्याने कार विहिरीतून बाहेर काढण्यात आली. सर्व मृतदेह ताब्यात घेऊन दिंडोरी येथील शासकीय रुग्णालयात पाठवण्यात आले. या दरम्यान घटनास्थळी मोठी गर्दी जमल्याने बचावकार्याला काही अडथळेही आले.

प्राथमिक तपासानुसार, चालकाचे वाहनावरील नियंत्रण सुटल्यामुळे हा अपघात झाल्याचा अंदाज व्यक्त करण्यात येत आहे. मात्र, नेमके कारण काय याचा तपास पोलिसांकडून सुरू आहे. दिंडोरी पोलिसांनी या प्रकरणी गुन्हा नोंदवून अधिक चौकशी सुरू केली आहे.

या घटनेमुळे दिंडोरी आणि परिसरात मोठी हळहळ व्यक्त होत आहे. एकाच कुटुंबातील ९ जणांचा मृत्यू झाल्याने गावावर दुःखाचा डोंगर कोसळला आहे. स्थानिक लोकप्रतिनिधी आणि प्रशासनानेही या घटनेबद्दल शोक व्यक्त केला आहे.

ही दुर्घटना पुन्हा एकदा रस्ते सुरक्षेचा आणि उघड्या विहिरींसारख्या धोकादायक ठिकाणांच्या सुरक्षिततेचा गंभीर प्रश्न उपस्थित करते. अशा घटनांना आळा घालण्यासाठी कठोर उपाययोजना करण्याची गरज व्यक्त केली जात आहे.