राजस्थान रेल्वे ट्रॅक स्फोटप्रकरणी पाक कनेक्शन उघड!

राजस्थानमधील श्रीगंगानगर येथील रामसिंगपूरमधील ५० जीबी रेल्वे रुळावर झालेल्या स्फोटाच्या प्रकरणात पोलिसांनी मोठे यश मिळवले आहे. रविवारी, राजस्थान आणि पंजाब पोलिसांच्या संयुक्त कारवाईत, पंजाबमधील गुरदासपूरचे रहिवासी असलेल्या दोन आरोपींना अटक करण्यात आली. आरोपींची ओळख देवेंद्र सिंग आणि महकदीप कौर अशी पटली आहे. त्यांच्या इतर साथीदारांनाही ताब्यात घेण्यात आले असून, पुढील तपास सुरू आहे.

मिळालेल्या माहितीनुसार, पोलिसांनी त्यांच्याकडून दोन पिस्तूल आणि अंदाजे ४० काडतुसे जप्त केल्याचा दावा केला आहे. मिळालेल्या माहितीनुसार, ३ नोव्हेंबर रोजी राजस्थानच्या श्रीगंगानगर भागातील अनुपगड-सुरतगड रेल्वे मार्गावरील ५० जीबी गावाजवळ रेल्वे रुळावर स्फोट झाला होता.

अटक करण्यात आलेले देविंदर सिंग आणि महकदीप कौर हे दोघेही लिव्ह-इन रिलेशनशिपमध्ये राहत होते. पाकिस्तानात बसलेल्या शाह नावाच्या हँडलरच्या सांगण्यावरून त्यांनी रामसिंगपूरजवळील रेल्वे रुळावर आयईडी स्फोटके लावून स्फोट केला. शनिवारी संध्याकाळी गुरदासपूरमधून दोघांना ताब्यात घेण्यात आले. पुढील चौकशीसाठी त्यांना श्रीगंगानगरमध्ये आणले आहे. रविवारी त्यांना कोर्टात हजर केले जाणार आहे.

हे ही वाचा:

इस्रायलच्या हवाई हल्ल्यात हमासचा वरिष्ठ कमांडर ठार

उत्तराखंडमध्ये काँग्रेस आमदाराने माईक फेकला, खुर्चीने केली मारहाण

ललित मोदी आता अधिकृतपणे ब्रिटिश नागरिक

होर्मुझच्या सामुद्रधुनीत भीषण स्फोटामुळे तीन तेलवाहू जहाजांना आग

या स्फोटानंतर तपासादरम्यान पोलिसांनी तब्बल ८१ लाख मोबाईल नंबरचा आणि इंटरनेट कॉलिंगचा डेटा तपासला. यामध्ये स्फोट झालेल्या भागात पंजाबमधील काही नंबरवरून इंटरनेटद्वारे फोन केले गेले होते. तपासात पंजाब पोलीस दलातील शिपाई कुलदीप आणि त्याची बायको नसीब कौर यांची नावे समोर आली. पोलिसांनी या दोघांना ताब्यात घेऊन चौकशी केली, तेव्हा त्यांनी एमआर हॉटेलमध्ये राहणाऱ्या देविंदर आणि महकदीपबद्दल माहिती दिली.

स्फोट घडवण्यापूर्वी देविंदर आणि महकदीप हे भटिंडा येथून टॅक्सीने विजयनगरला आले होते आणि एमआर हॉटेलमध्ये थांबले होते. १२ नोव्हेंबरच्या रात्री पोलिसांनी टॅक्सी चालकाला शोधून काढले. त्यानंतर हॉटेल मालक आणि त्याच्या वडिलांनाही चौकशीसाठी ताब्यात घेतले. या स्थानिकांनी आरोपींना राहण्याची सोय करून दिली तसेच गुन्ह्यासाठी बाईक आणि कारही उपलब्ध करून दिली होती. आरोपी देविंदरने रेकी करताना मोबाईल सोबत ठेवला होता, मात्र स्फोटाच्या रात्री घटनास्थळापासून ७० किलोमीटर आधीच त्याने आपला फोन बंद केला होता.