केंद्रीय मंत्री नितीन गडकरींकडे उंबरगाव-तलासरीच्या चार पदरी रस्त्याची मागणी

महाराष्ट्र आणि गुजरातच्या सीमेवर असलेल्या उंबरगाव पासून  तलासरी येथे चार पदरी महामार्ग तयार करण्यात यावा या मागणीसाठी उंबरगाव इंडस्ट्रीज असोसिएशनने केंद्रीय रस्ते, वाहतूक,महामार्ग मंत्री नितीन गडकरी याना पत्र लिहून विनंती केली आहे.

या असोसिएशनचे अध्यक्ष नरेश बांठीया आणि सचिव ताहेर व्होरा यांनी नितीन गडकरी यांची भेट घेऊन सदर निवेदन दिले. या पत्रात म्हटले आहे की, उंबरगाव हे मुंबईहून गुजरातकडे जाताना गुजरात सीमेवर वसलेले असून, ते सुमारे १२५ कि.मी. अंतरावर आहे. उमरगाममध्ये सुमारे १५०० औद्योगिक युनिट्स असून, त्यामध्ये सुमारे १ लाख कामगार कार्यरत आहेत. तलासरी ते उंबरगाव हा सुमारे १७ कि.मी. लांबीचा रस्ता असून, यातील सुमारे ६०० मीटर गुजरात राज्यात तर उर्वरित १६.४ कि.मी. महाराष्ट्र राज्यात येतो.

रस्ता नसल्यामुळे उद्योगांना मोठ्या अडचणींचा सामना करावा लागत आहे, कारण जवळचे बंदर (JNPT), बाजारपेठ (मुंबई), वाहतूक केंद्र (भिवंडी), विमानतळ (मुंबई) तसेच केंद्रशासित प्रदेश सिल्वासा यांच्याशी जोडणारा हा एकमेव थेट रस्ता अतिशय अरुंद व खराब अवस्थेत आहे. त्यामुळे गर्दीच्या वेळेत एका तासाहून अधिक विलंब होतो. नवी मुंबई–नवी दिल्ली महामार्गाचा प्रवेश/निर्गमन तलासरीजवळ असल्याने, येत्या काळात वाहनांची वर्दळ निश्चितच वाढणार आहे.

हे ही वाचा:

सुरक्षित गुंतवणुकीत चांदी चमकली! दर तीन लाखांच्या पार

बोरिवलीत ६.८० कोटींच्या दागिन्यांची चोरी

इराणच्या आंदोलनामध्ये ५,००० लोकांचा मृत्यू

डिजीटल अरेस्टची भीती दाखवून ज्येष्ठ नागरिकांना ४० लाखांना लुटले

उंबरगाव–तलासरी हा रस्ता

सध्या दोन लेनचा, अरुंद व अनेक वळणांनी युक्त आहे. त्यामुळे बस, ट्रक व ४० फूट लांबीचे कंटेनर सहजपणे जाऊ शकत नाहीत आणि त्यामुळे वाहतूक खोळंबते. या रस्त्याचे चार लेनमध्ये रुंदीकरण केल्यास केवळ उंबरगावमधील उद्योगांनाच नव्हे, तर तलासरी व आजूबाजूच्या परिसरातील सामान्य नागरिकांनाही मोठा फायदा होईल. हा परिसर आजपर्यंत विकासाच्या बाबतीत मागे राहिला आहे. तसेच उमरगाममध्ये उद्योग असलेले अनेक उद्योजक दररोज मुंबईहून रस्त्याने ये-जा करतात, त्यांनाही याचा मोठा लाभ होईल.

वरील सूचना या औद्योगिक शहराच्या एकूणच विकासासाठी अत्यंत उपयुक्त ठरतील. हा महत्त्वाचा प्रकल्प आपण आवश्यक त्या गंभीरतेने व तातडीने विचारात घ्याल, अशी आम्हाला अपेक्षा आहे. अनुकूल प्रतिसादाची अपेक्षा.