दक्षिण मुंबईतील कुलाबा परिसरात असलेल्या महाराष्ट्र पोलीस महासंचालक कार्यालयाच्या (DGP Office) परिसरात एक अत्यंत दुर्दैवी घटना घडली आहे. झाडाची मोठी फांदी अंगावर पडल्याने सार्वजनिक बांधकाम विभागातील (PWD) एका ४३ वर्षीय कर्मचाऱ्याचा मृत्यू झाला आहे. अनिल गोरे (वय ४३) असे या मृत कर्मचाऱ्याचे नाव असून, ते पीडब्ल्यूडी विभागात इलेक्ट्रिशन म्हणून कार्यरत होते. गुरुवारी कर्तव्यावर असताना ते पाणी पिण्यासाठी जात होते, त्याच वेळी अचानक झाडाची एक मोठी फांदी त्यांच्या अंगावर कोसळली. या घटनेत गोरे गंभीर जखमी झाले होते.
या घटनेनंतर त्यांना तातडीने उपचारासाठी जवळच्या सेंट जॉर्ज रुग्णालयात नेण्यात आले. मात्र, तिथे पोहोचल्यानंतर डॉक्टरांनी त्यांना तपासून मृत घोषित केले. या घटनेमुळे त्यांच्या सहकाऱ्यांमध्ये आणि परिसरात हळहळ व्यक्त केली जात आहे.
या प्रकरणाची नोंद कुलाबा पोलीस ठाण्यात करण्यात आली आहे. पोलिसांनी सध्या या घटनेची ‘अपघाती मृत्यू’ (ADR) म्हणून नोंद केली असून पुढील तपास सुरू आहे.
