कटरा-बनिहाल रेल्वेमार्गावर वेगाचा नवा विक्रम

जम्मू-काश्मीरमधील उधमपूर-श्रीनगर-बारामुल्ला रेल्वे लिंक (USBRL) प्रकल्पासाठी २ ऑक्टोबर २०२६ हा ऐतिहासिक दिवस ठरला आहे. श्री माता वैष्णोदेवी कटरा ते बनिहाल या १११ किलोमीटर लांबीच्या रेल्वेमार्गावरील गाड्यांचा कमाल अनुमत वेग आता ताशी ७५ किलोमीटरवरून १०० किलोमीटर करण्यात आला आहे. या वाढीव वेगाची यशस्वी चाचणी आज घेण्यात आली. केंद्रीय रेल्वेमंत्री अश्विनी वैष्णव यांनी सोशल मीडिया प्लॅटफॉर्म ‘एक्स’वर पोस्ट करत याबाबतची माहिती दिली. या चाचणीदरम्यान वंदे भारत एक्स्प्रेसने ताशी १०० किलोमीटर वेगाने धावत जगातील सर्वाधिक उंचीवरील रेल्वे पूल असलेल्या चिनाब पुलासह भारतातील पहिल्या केबल-स्टेड अंजी पुलावरून प्रवास करत नवा विक्रम प्रस्थापित केला.
हे ही वाचा:
दिनू मोरियाला मिठी भोवली

जन्मदिनी लवलीनाचा सुवर्ण पंच!

या वेगवाढीमुळे USBRL प्रकल्पावरील रेल्वे वाहतूक अधिक सुरळीत आणि कार्यक्षम होण्यास मदत होणार आहे. कटरा-बनिहाल मार्गावरील प्रवासाचा वेळ कमी होण्याबरोबरच जम्मू-काश्मीरच्या दुर्गम आणि डोंगराळ भागातील रेल्वे कनेक्टिव्हिटीला आणखी वेग मिळणार आहे. आधुनिक अभियांत्रिकीचा उत्कृष्ट नमुना असलेल्या चिनाब आणि अंजी पुलांवरून ताशी १०० किलोमीटर वेगाने वंदे भारत एक्स्प्रेसची चाचणी यशस्वी होणे हे भारतीय रेल्वेच्या पायाभूत सुविधा आणि तांत्रिक क्षमतेतील महत्त्वपूर्ण प्रगती मानली जात आहे. या बदलामुळे प्रवाशांना अधिक वेगवान, सुरक्षित आणि आरामदायी रेल्वे प्रवासाचा अनुभव मिळण्याची अपेक्षा आहे.

जम्मू-काश्मीरमधील रेल्वे संपर्क अधिक सक्षम करण्याच्या दृष्टीने हा टप्पा महत्त्वाचा असून, USBRL प्रकल्पामुळे देशाच्या उर्वरित भागाशी काश्मीर खोऱ्याची रेल्वे जोडणी अधिक मजबूत झाली आहे. विशेषतः चिनाब आणि अंजी पुलांसारख्या अभियांत्रिकी आव्हानांवर मात करत रेल्वेसेवा अधिक वेगाने सुरू करण्याची क्षमता भारतीय रेल्वेने या चाचणीच्या माध्यमातून दाखवून दिली आहे.