रस्त्यावरून जाणाऱ्या आईस्क्रीम विक्रेत्याकडून आईस्क्रीम घेण्याच्या प्रयत्नात एका युवकाचा तोल जाऊन तो थेट पहिल्या मजल्यावरील बाल्कनीतून खाली कोसळल्याची धक्कादायक घटना उत्तर प्रदेशातील सोनभद्र जिल्ह्यात घडली आहे. या संपूर्ण घटनेचे सीसीटीव्ही फुटेज सोशल मीडियावर मोठ्या प्रमाणात व्हायरल होत आहे.
माहितीनुसार, संबंधित युवक आपल्या घराच्या पहिल्या मजल्यावरील बाल्कनीत उभा होता. त्यावेळी खाली रस्त्यावरून एक आईस्क्रीम विक्रेता जात होता. आईस्क्रीम घेण्यासाठी युवकाने बाल्कनीतून खाली वाकून विक्रेत्याकडे हात पुढे केला. मात्र, जास्त पुढे झुकल्यामुळे त्याचा तोल गेला आणि तो थेट खाली पडला. सीसीटीव्ही फुटेजमध्ये युवक आईस्क्रीम घेण्याचा प्रयत्न करताना दिसतो. काही क्षणांतच त्याचा तोल सुटतो आणि तो बाल्कनीवरून खाली कोसळतो. ही घटना इतक्या वेगाने घडते की आजूबाजूच्या लोकांनाही प्रतिक्रिया देण्याची संधी मिळत नाही.
घटनेनंतर परिसरातील नागरिकांनी तातडीने धाव घेत युवकाला मदत केली. त्याला उपचारासाठी रुग्णालयात दाखल करण्यात आले असून तो जखमी झाला आहे. सुदैवाने या अपघातात त्याचा जीव वाचल्याची माहिती पोलिसांनी दिली आहे. या घटनेचा व्हिडिओ सोशल मीडियावर वेगाने व्हायरल होत असून अनेकांनी युवकाच्या निष्काळजीपणावर आश्चर्य व्यक्त केले आहे. किरकोळ गोष्टींसाठी जीव धोक्यात घालू नये, अशा प्रतिक्रिया नेटकऱ्यांकडून व्यक्त केल्या जात आहेत.
हे ही वाचा:
पंतप्रधान मोदी जाणार सेशेल्सच्या तीन दिवसीय दौऱ्यावर
बांगलादेशी नागरिकांसाठी पुन्हा पर्यटन व्हिसा सेवा सुरू
बंगालमध्ये न्यायिक अधिकाऱ्यांना ओलीस ठेवल्याप्रकरणी स्थानिक नेत्याला अटक
“पत्रकारांविषयी अपमानास्पद वक्तव्य करण्याचा हेतू नव्हता”
व्हायरल झालेल्या सीसीटीव्ही फुटेजवर प्रतिक्रिया देताना सोनभद्र पोलिसांनी सांगितले, “हे कळविण्यात येते की, व्हायरल व्हिडिओमध्ये दिसणारी व्यक्ती जखमी झाली असून, तिच्यावर रुग्णालयात उपचार सुरू आहेत. सध्या परिस्थिती सामान्य असून, कायदा आणि सुव्यवस्थेशी संबंधित कोणतीही समस्या नाही.” आईस्क्रीम खरेदीची एक साधी गोष्ट एका भीषण अपघातात बदलली, ज्यात एक मोठी दुर्घटना थोडक्यात टळली.
