सीबीआयने कोलकात्याच्या आरजी कार मेडिकल कॉलेज आणि हॉस्पिटलच्या आवारात पोलीस चौकीत कर्तव्यावर असलेल्या ११ पोलीस कर्मचाऱ्यांना समन्स बजावले आहे. गेल्या वर्षी ९ ऑगस्ट रोजी एका ३१ वर्षीय प्रशिक्षणार्थी डॉक्टरवर येथे बलात्कार आणि हत्या करण्यात आली होती.
काही उपनिरीक्षक, सहाय्यक उपनिरीक्षक आणि तळा पोलिस स्टेशनचे कॉन्स्टेबल जे घटनेच्या दिवशी हॉस्पिटल कॅम्पसच्या आतील पोलिस चौकीत कर्तव्य बजावत होते त्यांना सोमवारी आणि मंगळवारी सीजीओ संकुलातील केंद्रीय एजन्सीसमोर हजर राहण्यास सांगितले आहे, असे सूत्रांनी सांगितले. सीबीआय या आठवड्यात या प्रकरणासंदर्भात पुरवणी आरोपपत्र दाखल करण्याची शक्यता आहे, असेही ते म्हणाले.
हेही वाचा..
काँग्रेसने रोहित शर्माची खिल्ली उडवताच भाजप आक्रमक
मुंबईत ड्रग्ज माफीयांच्या रडारवर कोण ?
संवादाची अपेक्षा करणारे विरोधक चहापानापासून पळाले
मुंबई श्री शरीरसौष्ठव स्पर्धा ७ मार्चला रंगणार
प्रशिक्षणार्थी डॉक्टरचा मृतदेह अर्धनग्न अवस्थेत रुग्णालयाच्या सेमिनार हॉलमध्ये आढळल्याने देशभरात निषेध व्यक्त करण्यात आला होता. १० ऑगस्ट २०२४ रोजी गुन्ह्याच्या एका दिवसानंतर कोलकाता पोलिसांमध्ये नागरी स्वयंसेवक असलेल्या संजय रॉयला अटक करण्यात आली. कोलकाता पोलिसांनी पीडितेच्या मृतदेहाजवळ सापडलेल्या ब्लूटूथ इअरफोनवरून रॉयची ओळख पटवली. सीसीटीव्ही फुटेजमध्ये तो गळ्यात उपकरण घेऊन सेमिनार हॉलमध्ये प्रवेश करताना दिसत होता.
ट्रायल कोर्टाने २० जानेवारी रोजी रॉय या एकमेव दोषीला मरेपर्यंत जन्मठेपेची शिक्षा सुनावली होती. २४ फेब्रुवारी रोजी सीबीआयने बलात्कार-हत्या प्रकरणाच्या तपासाबाबत कोलकाता न्यायालयात स्थिती अहवाल सादर केला. केंद्रीय एजन्सीने सांगितले की, ते लवकरच या प्रकरणाच्या संदर्भात न्यायालयासमोर पुरवणी आरोपपत्र सादर करणार आहेत.
आरजी कार रुग्णालयाचे माजी प्राचार्य संदीप घोष आणि तळा पोलीस ठाण्याचे माजी प्रभारी अधिकारी अभिजित मोंडल हे या प्रकरणातील अन्य दोन आरोपी आहेत. गेल्या वर्षी १३ डिसेंबर रोजी न्यायालयाने मोंडल आणि घोष यांना जामीन मंजूर केला होता. मोंडल यांच्यावर एफआयआर दाखल करण्यास विलंब केल्याचा आरोप होता, तर घोष यांच्यावर पुराव्याशी छेडछाड केल्याचा आरोप होता. तथापि आरजी कार हॉस्पिटलमधील कथित आर्थिक अनियमिततेच्या दुसऱ्या प्रकरणात घोष न्यायालयीन कोठडीत आहे आणि बलात्कार-हत्या प्रकरणात जामीन मिळूनही तो तुरुंगात आहे.
