एसआयआरनंतर कर्नाटकच्या मतदार यादीतून ९९ लाख नावे वगळली

कर्नाटकातील मतदार यादीच्या विशेष सखोल पुनरीक्षणानंतर (एसआयआर) अंतिम मतदार यादीतून सुमारे ९९ लाख नावे वगळण्यात आली आहेत. या प्रक्रियेपूर्वी राज्यातील मतदारांची संख्या ५.५४ कोटी होती. पुनरीक्षणानंतर ती घटून सुमारे ४.५५ कोटींवर आली आहे. निवडणूक यादीतील दुबार नोंदी, मृत मतदार आणि स्थलांतरित मतदारांची पडताळणी करण्याच्या उद्देशाने ही मोहीम राबवण्यात आली.

निवडणूक यादी अधिक अचूक करण्यासाठी निवडणूक आयोगाने ही प्रक्रिया हाती घेतली होती. मात्र, मोठ्या प्रमाणावर नावे वगळली गेल्याने या निर्णयाकडे लक्ष वेधले जात आहे. विशेषतः स्थलांतरित किंवा पडताळणीदरम्यान घरी न आढळलेल्या मतदारांची नावेही वगळण्यात आलेल्या गटात असल्याने, पात्र मतदारांनी अंतिम यादीत आपले नाव आहे की नाही, हे तपासणे महत्त्वाचे ठरणार आहे.

कर्नाटकच्या अंतिम मतदार यादीत ४.५५ कोटी मतदार असतील. एसआयआर सुरू होण्यापूर्वी, राज्याच्या मतदार यादीत ५.५४ कोटी मतदार होते. अंतिम मतदार यादीनुसार, पुरुषांपेक्षा महिला मतदार अधिक आहेत. २.२५ कोटी पुरुषांच्या तुलनेत २.२९ कोटी महिला मतदार आहेत.

हे ही वाचा:

‘न्यूजक्लिक’ला भारतविरोधी प्रचारासाठी कोट्यवधींचा निधी

आजारपणाचा बहाणा करून तामिळनाडूच्या तुरुंगातून १७ कैदी फरार

अल्पवयीन मुलीवरील अत्याचार-हत्येचा आरोपी पोलिसांच्या गोळीबारात ठार

भारत-बांगलादेश सीमेवर कुंपणाच्या कामाला वेग

२४ ऑगस्ट रोजी प्रसिद्ध झालेल्या मसुदा मतदार यादीत ४.४६ कोटी मतदारांचा समावेश होता. उर्वरित मतदारांपैकी अनेकांची नावे अनुपस्थिती, कायमस्वरूपी स्थलांतर, मृत्यू, दुसऱ्या ठिकाणी दुबार नोंदणी किंवा इतर कारणांमुळे पडताळणीसाठी चिन्हांकित करण्यात आली होती. पडताळणीदरम्यान सुमारे ४३.८१ लाख मतदारांना नोटिसा बजावण्यात आल्या होत्या. त्यांच्या नोंदींमध्ये विसंगती असल्याने किंवा जुन्या मतदार यादीशी त्यांची माहिती जुळत नसल्याने त्यांना आपली पात्रता सिद्ध करण्याची संधी देण्यात आली. दावे आणि हरकतींची प्रक्रिया पूर्ण झाल्यानंतर २७ ऑक्टोबर रोजी अंतिम मतदार यादी प्रसिद्ध करण्यात आली.