छत्तीसगडमधील विजापूर जिल्ह्यात गुरुवारी (१३ मार्च) १७ नक्षलवाद्यांनी आत्मसमर्पण केले. त्यापैकी नऊ जणांच्या डोक्यावर एकूण २४ लाख रुपयांचे बक्षीस होते. एका वरिष्ठ पोलिस अधिकाऱ्याने सांगितले की, नक्षलवाद्यांनी वरिष्ठ पोलिस आणि केंद्रीय राखीव पोलिस दलाच्या (सीआरपीएफ) अधिकाऱ्यांसमोर आत्मसमर्पण केले. यामध्ये एका जोडप्याचाही समावेश आहे. विजापूरचे एसपी जितेंद्र कुमार यादव म्हणाले की, “पोकळ” आणि “अमानवी माओवादी विचारसरणी, वरिष्ठ कमांडर कॅडरकडून निष्पाप आदिवासींचे शोषण आणि सुरक्षा दलांच्या वाढत्या प्रभावामुळे निराश होऊन नक्षलवाद्यांनी आत्मसमर्पण केले आहे
एसपी जितेंद्र कुमार यादव पुढे म्हणाले, निया नेलनार’ (तुमच्यासाठी चांगले गाव) योजनेने ते प्रभावित झाले आहेत, ज्या अंतर्गत सुरक्षा दल आणि प्रशासन अंतर्गत भागात मूलभूत सुविधा पुरवण्याचा आणि विकास कामे करण्याचा प्रयत्न करत आहेत. एका वरिष्ठ पोलिस अधिकाऱ्याने सांगितले की, आत्मसमर्पण केलेल्या नक्षलवाद्यांपैकी एक दिनेश मोदीयम (३६) हा माओवादी विभागीय समिती सदस्य होता. तो विजापूर जिल्ह्यातील २६ प्रकरणांमध्ये हवा होता. तसेच, त्याच्यावर ८ लाख रुपयांचे बक्षीस होते. त्यांनी पुढे सांगितले की, नक्षलवादी दिनेश मोदीयम याची पत्नी ज्योती ताती उर्फ कला मोदीम (३२) आणि दुला करम (३२) या दोघीही क्षेत्र समिती सदस्य म्हणून सक्रिय होत्या आणि त्यांच्या डोक्यावर प्रत्येकी ५ लाख रुपयांचे बक्षीस होते. इतर ६ नक्षलवाद्यांवर प्रत्येकी १ लाख रुपयांचे बक्षीस होते.
हे ही वाचा :
तीन हत्यांनी हादरले कळवा मुंब्रा, २४ तासात तिन्ही खुनाची उकल
झारखंडमधील गुमला येथे दोन लाखांचे बक्षीस असलेल्या नक्षलवाद्यासह तिघांना अटक!
मनीष सिसोदिया आणि सत्येंद्र जैन यांना मोठा धक्का!
दुखापतग्रस्त राहुल द्रविड कुबड्या घेऊन रॉयल्सच्या प्रशिक्षण शिबिरात
अधिकारी यादव म्हणाले, जिल्हा राखीव रक्षक दल, बस्तर फायटर्स, स्पेशल टास्क फोर्स, सीआरपीएफ आणि त्यांची विशेष युनिट कोब्रा (कमांडो बटालियन फॉर रिझोल्यूट अॅक्शन) यांनी या नक्षलवाद्यांच्या आत्मसमर्पणात महत्त्वाची भूमिका बजावली. त्यांनी सांगितले की, नक्षलवाद्यांना प्रत्येकी २५,००० रुपयांची मदत देण्यात आली आहे आणि त्यांना मुख्य प्रवाहात समाविष्ट करण्यासाठी सरकारी धोरणानुसार त्यांचे पुनर्वसन केले जाईल. दरम्यान, या वर्षी आतापर्यंत राज्यातील बस्तर रेंजमधील विजापूर जिल्ह्यात ६५ नक्षलवाद्यांनी आत्मसमर्पण केले आहे. गेल्या वर्षी, बिजापूरसह सात जिल्ह्यांचा समावेश असलेल्या बस्तर प्रदेशात ७९२ नक्षलवाद्यांनी आत्मसमर्पण केले होते.
