तेजस अपघातात हुतात्मा झालेले हवाई दलाचे विंग कमांडर नमांश सियाल कोण होते?

शुक्रवारी दुबई एअर शो २०२५ मध्ये भाग घेत असताना संयुक्त अरब अमिरातीमध्ये आयएएफ तेजस लढाऊ विमान कोसळून भीषण अपघात झाला. या अपघातात भारतीय हवाई दलाचे विंग कमांडर नमांश सियाल (३४) हुतात्मा झाले. त्यांच्या निधनाने हिमाचल प्रदेशातील नागरोटा बागवान येथील पटियालाकड गाव शोकाकुल झाले आहे. स्थानिक वेळेनुसार शुक्रवारी दुपारी या प्रतिष्ठित कार्यक्रमात सराव आणि प्रात्यक्षिक उड्डाणादरम्यान हे भारतीय बनावटीचे विमान कोसळले.

नगरोटा बागवान येथील रहिवासी विंग कमांडर सियाल हे त्यांच्या शिस्त आणि उत्तम सेवा रेकॉर्डसाठी ओळखले जात होते. त्यांनी त्यांचे शालेय शिक्षण हमीरपूर जिल्ह्यातील सुजानपूर तिराच्या सैनिक शाळेत केले. त्यांच्या पश्चात त्यांचे वृद्ध पालक, त्यांची पत्नी ज्या भारतीय हवाई दलात अधिकारी आहेत आणि त्यांची सहा वर्षांची मुलगी असा परिवार आहे.

नमांश यांचे वडील, जगन नाथ हे एक निवृत्त लष्करी अधिकारी होते जे नंतर हिमाचल प्रदेश शिक्षण विभागात प्राचार्य म्हणून कार्यरत झाले. त्यांची आई बीना देवी दुर्घटनेच्या वेळी त्यांच्या मुलाला आणि सुनेला भेटण्यासाठी हैदराबादमध्ये होत्या. घटनास्थळावरून समोर आलेल्या अपघाताच्या दृश्यांमध्ये तेजस विमान हे वेगाने जमिनीच्या दिशेने येत असताना दिसत आहे. तसेच जमिनीवर आदळत असताना विमान आगीच्या मोठ्या गोळ्यात फुटताना दिसून आले. अपघातस्थळावरून दाट धुराचे लोट येत होते, ज्यामुळे दुबई एअरशोमधील प्रेक्षक थक्क झाले होते. या प्राणघातक अपघाताच्या बातमीने कांग्रा खोऱ्यात शोककळा पसरली, रात्री उशिरापर्यंत गावकरी कुटुंबाच्या घराबाहेर जमले.

हे ही वाचा:

“ती चूक होती आणि आता…” NAAC च्या नोटीसला अल- फलाह विद्यापीठाने काय दिले उत्तर?

पाकिस्तान धुमसतोय; पीटीआय आणि टीटीएपीची देशव्यापी निदर्शने

मालवणी पॅटर्नवरून मंत्री मंगलप्रभात लोढांना अस्लम शेखची धमकी

देशभरातील घुसखोरांना शोधून हाकलणार!

मुख्यमंत्री सुखविंदर सिंग सुखू यांनी तीव्र दुःख व्यक्त केले, देशाने एक धाडसी आणि समर्पित पायलट गमावला आहे असे म्हटले. विंग कमांडर स्याल यांचे शौर्य आणि राष्ट्राप्रती अढळ वचनबद्धता नेहमीच लक्षात ठेवली जाईल असे त्यांनी सांगितले आणि शोकाकुल कुटुंबाप्रती मनापासून संवेदना व्यक्त केल्या. विंग कमांडर स्याल यांच्या अंत्यसंस्काराची माहिती अद्याप निश्चित झालेली नाही.