प्रचंड मोठी लाट बसच्या दिशेने आली…दांपत्याने ५०० पायऱ्या चढत वाचवला जीव

- Advertisement -

नेपाळच्या रसुवा जिल्ह्यात आपल्या पर्यटक बसच्या दिशेने पाण्याची महाकाय भिंत वेगाने येताना पाहिल्यानंतर अंजना राजा यांना सगळेच संपले अशी भावना मनात आली. आता आपण काही जगत नाही, या विचाराने त्यांचे डोके चालेनासे झाले. मात्र तरीही ते दांपत्य बचावले. त्याची थरारक कहाणी त्यांनी एका वाहिनीवर बोलताना सांगितली.

अंजना म्हणाल्या की, जिवाच्या आकांताने त्यांनी आणि त्यांच्या जोडीदाराने बसमधून उडी मारली आणि अवघ्या काही सेकंदांत तब्बल ५०० पायऱ्या चढून स्वतःला वाचवले. त्यांच्या डोळ्यांसमोरच ‘मृत्यू’ उभा होता. या संपूर्ण काळात त्यांनी एकमेकांची साथ सोडली नाही. मला फक्त तो माझ्या आयुष्यात हवा होता, असे अंजना राजा यांनी आपल्या जोडीदार पट्टाभिरामन वेंकटेशन यांच्याबद्दल बोलताना सांगितले.

भारतीय वंशाचे हे जोडपे तिबेटच्या पहिल्या तीर्थयात्रेसाठी गेले होते. त्यावेळी त्यांच्या आजूबाजूला हिमालयातील भीषण आपत्ती घडली. अमेरिकेतील सॅन फ्रान्सिस्को बे एरियातील हे जोडपे चीनच्या सीमेजवळील नेपाळमधील तिमुरे गावातून बसने प्रवास करत होते. त्याचवेळी पर्वतावरून अचानक पाणी आणि ढिगाऱ्याचा प्रचंड प्रवाह खाली आला. सुरुवातीला त्यांना नेमके काय घडत आहे हे समजत नव्हते. अंजना राजा यांनी सांगितले की, तो पाण्याचा लोट ६० ते ७० फूट उंच, तपकिरी आणि धुळीने भरलेला दिसत होता. तर वेंकटेशन यांना सुरुवातीला ती “जंगलातील आग” वगैरे असेल असे वाटले.

हे ही वाचा:

कामगिरीवर लक्ष द्या, निवडकर्ते स्वतः शोधत येतील!

“समजावून थकलो, तरी चुका सुरूच!”; एफडीएला हायकोर्टाचा दणका

नांदेड हल्ला : शिरोमणी अकाली दलचे राजकीय विघटन

अखेरची झुंज अपुरी; विश्वचषकात भारत आठव्या स्थानी

“भूकंप झाला आहे की नाही, हे आम्हाला समजत नव्हते. हिमस्खलन झाले आहे की नाही, हेही समजत नव्हते,” असे त्यांनी सीबीएसला सांगितले. त्यांच्या म्हणण्यानुसार, हे सर्व काही त्यांच्यापासून अवघ्या ५० फूट अंतरावर घडत होते. राजा यांनी सांगितले की, त्यांच्या बसच्या पुढील भागात चालक, वाहक आणि दोन मदतनीस दिसत नव्हते. ते उडी मारून बाहेर पडले होते. हे पाहून आणि समोर येणारी प्रचंड पाण्याची भिंत पाहून या जोडप्यानेही बसमधून उडी मारली. अंजना राजा यांनी आपल्या जोडीदाराची कॉलर पकडली आणि “पळ” असे त्या ओरडल्या.

बसबाहेर आल्यानंतर नेपाळमध्ये नेमके काय आले आहे, हे त्यांना स्पष्ट झाले.

वेंकटेशन यांनी सीबीएसला सांगितले, “ज्या क्षणी आम्ही उठलो आणि डोंगरावर सुमारे १० फूट वर गेलो, त्या क्षणी मला हा राक्षसी प्रवाह खाली येताना दिसला. राजा यांनी सांगितले की, त्यांनी गाठलेली पहिली जागा ही पोलीस छावणी होती. मात्र, ती चौकी आणि तेथील लोक त्यांच्या डोळ्यांसमोरच पुराच्या पाण्यात वाहून गेले.

प्रतिक्रिया देण्यासाठी फारच कमी वेळ असल्याने त्यांनी उंच जागेकडे धाव घेतली आणि चढाई सुरू केली. वाटेत त्यांनी घरे कोसळताना पाहिली. प्रचंड पुराच्या पाण्यात लोक वाहून जात असताना त्यांच्या किंकाळ्या आणि रडण्याचे आवाज ऐकू येत होते. ही चढाई अत्यंत धोकादायक होती. मात्र, एका मार्गदर्शकाच्या मदतीने आणि शरीरात निर्माण झालेल्या प्रचंड ऍड्रेनालिनमुळे त्यांनी काही सेकंदांत जवळच्या पर्वताच्या माथ्यावरील सपाट भाग गाठला.

अंजना राजा म्हणाल्या, “आम्ही इतक्या उंच कसे चढलो, हे मलाच माहीत नाही. राजा म्हणाल्या की, संपूर्ण प्रवासात त्यांनी वेंकटेशन यांची साथ सोडली नाही. “मी त्यांना माझ्याजवळ असल्याची खात्री केली… मी त्यांना सतत पकडून ठेवत होते. मला फक्त ते माझ्या आयुष्यात हवे होते,” असे त्या म्हणाल्या.

या जोडप्याने स्थानिक रहिवासी आणि इतर पर्यटकांसोबत एका शेळीच्या गोठ्यात रात्र काढली. दुसऱ्या दिवशी त्यांना हवाई मार्गाने सुरक्षित ठिकाणी नेण्यात आले. वेंकटेशन यांना अजूनही विश्वास बसत नाही की ते या भीषण विध्वंसातून वाचले. त्यांनी या घटनेचे वर्णन “चमत्कारापेक्षा कमी नाही” असे केले. केवळ हे जोडपेच नव्हे, तर त्यांच्या पर्यटक बसमधील सर्व प्रवासीही बचावले आहेत.