११ टन साहित्य घेऊन नेपाळसाठी नववे विमान रवाना

नेपाळमध्ये आलेल्या विनाशकारी पुरानंतर निर्माण झालेल्या कठीण परिस्थितीचा सामना करण्यासाठी भारताने पुन्हा एकदा मदतीचा हात पुढे केला आहे. भारताने नेपाळला मदतीची आणखी एक मोठी खेप पाठवली असून या मदत सामग्रीमध्ये औषधांसोबतच न्यायवैद्यक तपासणीसाठी आवश्यक साहित्याचाही समावेश आहे. भारतीय हवाई दलाचे विमान ही सर्व मदत सामग्री घेऊन नेपाळकडे रवाना झाले आहे.

परराष्ट्र मंत्रालयाचे (एमईए) प्रवक्ते रणधीर जायसवाल यांनी सोशल मीडिया प्लॅटफॉर्म एक्सवर परराष्ट्र मंत्री एस. जयशंकर यांच्या पोस्टचा हवाला देत ही माहिती दिली. पोस्टमध्ये म्हटले आहे, “भारताने नेपाळला मदत सामग्रीची आणखी ११ टनांची खेप पाठवली आहे. नेपाळच्या पुनर्वसन आणि पुनर्प्राप्तीच्या प्रयत्नांना मदत करण्यासाठी मदत सामग्री घेऊन जाणारे भारतीय हवाई दलाचे हे नववे विमान होते.”

यापूर्वी जयशंकर यांनी पाठवण्यात आलेल्या सामग्रीचा उल्लेख करताना म्हटले होते, “नेपाळला मदत सामग्रीची आणखी एक खेप (११ टन) पाठवण्यात आली आहे. यात औषधे, न्यायवैद्यक तपासणीचे साहित्य, तंबू, स्वच्छता किट, स्लीपिंग बॅग आणि इतर आवश्यक वस्तूंचा समावेश आहे. भारत नेपाळच्या पुनर्बांधणीसाठी मदत करत राहिला आहे.” भारताने आतापर्यंत नेपाळला १४० टनांहून अधिक मानवतावादी मदत आणि आपत्ती निवारण (एचएडीआर) सामग्री पाठवली आहे. परराष्ट्र मंत्रालयाकडून यासंदर्भात सातत्याने माहिती दिली जात आहे. निवेदने आणि पत्रकार परिषदांच्या माध्यमातून मंत्रालयाने स्पष्ट केले आहे की, मदत सामग्रीसोबत तज्ज्ञांनाही भारताने नेपाळमध्ये पाठवले आहे.

हे ही वाचा:

एझिमला नौदल अकादमीतून बांगलादेशी नागरिकाला अटक

अजित आगरकरना मुदतवाढ की नवे निवडसमिती प्रमुख?

तीन बड्या वृत्तसंस्थांना व्हाईट हाऊसचे दरवाजे बंद!

ग्रीनलँडच्या सुरक्षेवर अमेरिकेचे ‘कायमस्वरूपी नियंत्रण’!

नवी दिल्लीने पुरानंतर बोगदे आणि चिखलातून बचाव कार्यासाठी विशेष उपकरणे, डीएनए किट आणि न्यायवैद्यक उपकरणेही तातडीने उपलब्ध करून दिली होती. याशिवाय तात्पुरते निवारे, ब्लँकेट, स्वच्छता किट, सौर दिवे आणि औषधे यांसारख्या आवश्यक वस्तूही वेळोवेळी पाठवल्या जात आहेत. मदत सामग्री पोहोचवण्यासाठी भारतीय हवाई दलाने आतापर्यंत नऊ विशेष उड्डाणे केली आहेत. पुरानंतर नेपाळच्या बचाव, मदत आणि पुनर्बांधणीच्या प्रयत्नांना सहकार्य करण्यासाठी भारत कटिबद्ध असल्याचे भारताने म्हटले आहे.