भारतात एफडीआयचा ओघ वाढला

- Advertisement -

भारतामध्ये थेट परकीय गुंतवणुकीचा अर्थात एफडीआयचा ओघ वाढला असून, चालू आर्थिक वर्षाच्या एप्रिल ते जून या पहिल्या तिमाहीत एफडीआय इक्विटी गुंतवणूक ६ टक्क्यांनी वाढून १९.८१ अब्ज डॉलरवर पोहोचली आहे. मागील आर्थिक वर्षाच्या याच कालावधीत भारताला १८.६२ अब्ज डॉलरची एफडीआय मिळाली होती. देशातील गुंतवणुकीचे वातावरण, उत्पादन आणि सेवा क्षेत्रातील संधी तसेच भारताची वेगाने वाढणारी अर्थव्यवस्था यामुळे परदेशी गुंतवणूकदारांचा भारताकडे कल कायम असल्याचे या आकडेवारीतून स्पष्ट होत आहे.

वाणिज्य आणि उद्योग मंत्रालयाच्या उद्योग व अंतर्गत व्यापार प्रोत्साहन विभागाने जाहीर केलेल्या आकडेवारीनुसार, एप्रिल-जून तिमाहीत जपान भारतातील सर्वात मोठा परकीय गुंतवणूकदार ठरला. जपानकडून भारतात ५.७ अब्ज डॉलरची गुंतवणूक झाली. त्यानंतर सिंगापूरचा क्रमांक असून, सिंगापूरमधून ५.२ अब्ज डॉलरची गुंतवणूक आली. मॉरिशसकडून २.३ अब्ज डॉलर, नेदरलँड्सकडून १.३८ अब्ज डॉलर, अमेरिकेकडून १.३४ अब्ज डॉलर आणि संयुक्त अरब अमिरातीमधून ८६८ दशलक्ष डॉलरची गुंतवणूक झाली.
हे ही वाचा:
‘लालबागच्या राजा’ला भावपूर्ण निरोप!

सप्टेंबरमध्ये आयपीओ बाजारात जोरदार धूम

जम्मू-काश्मीर विधानसभेत राडा; भाजप आमदाराला काढले बाहेर z

भारताला धडा शिकवल्याचा शरीफ यांचा दावा; तेवढ्यात कुणीतरी फसकन हसले!

मात्र अमेरिकेच्या गुंतवणुकीत यंदा मोठी घट झाल्याचे आकडेवारीतून समोर आले आहे. मागील वर्षी एप्रिल-जूनमध्ये अमेरिकेकडून भारतात ५.६१ अब्ज डॉलरची एफडीआय आली होती. यंदा हा आकडा १.३४ अब्ज डॉलरवर घसरला आहे. त्यामुळे अमेरिकन गुंतवणुकीत मोठी घट झाली असली तरी जपान आणि सिंगापूरसह अन्य देशांकडून आलेल्या गुंतवणुकीमुळे एकूण एफडीआयमध्ये वाढ नोंदवण्यात आली आहे.

क्षेत्रनिहाय विचार केला तर सेवा क्षेत्राने सर्वाधिक परकीय गुंतवणूक आकर्षित केली आहे. या क्षेत्रात ७.०४ अब्ज डॉलरची एफडीआय आली. संगणक सॉफ्टवेअर आणि हार्डवेअर क्षेत्राला २.८४ अब्ज डॉलर, व्यापार क्षेत्राला १.९२ अब्ज डॉलर, अपारंपरिक ऊर्जा क्षेत्राला १.२४ अब्ज डॉलर आणि वाहन क्षेत्राला ६२२ दशलक्ष डॉलरची गुंतवणूक मिळाली. यामुळे सेवा, तंत्रज्ञान, ऊर्जा आणि वाहन उद्योगांमध्ये भारताची गुंतवणूक क्षमता वाढत असल्याचे दिसून येते.

राज्यनिहाय पाहता तामिळनाडूने ५.९५ अब्ज डॉलरची एफडीआय आकर्षित करून आघाडी घेतली. महाराष्ट्रात ४.२२ अब्ज डॉलर, दिल्लीत २.६७ अब्ज डॉलर, कर्नाटकात २.११ अब्ज डॉलर आणि गुजरातमध्ये १.३ अब्ज डॉलरची गुंतवणूक झाली. एकूणच, भारतात परकीय भांडवलाचा प्रवाह कायम असून, उत्पादन, तंत्रज्ञान, सेवा आणि ऊर्जा क्षेत्रांतील वाढत्या संधींमुळे आगामी काळातही एफडीआय देशाच्या आर्थिक वाढीतील महत्त्वाचा घटक ठरण्याची शक्यता आहे.