२५ रुपये लिटर इंधनावर धावणार कार

केंद्रीय रस्ते वाहतूक आणि महामार्ग मंत्री नितीन गडकरी यांनी इथेनॉलवर चालणाऱ्या कारबाबत मोठी माहिती दिली आहे. ऑक्टोबर महिन्यात देशात १०० टक्के इथेनॉलवर चालणारी कार बाजारात आणली जाणार असल्याचे त्यांनी सांगितले. टोयोटाची ‘इनोव्हा फ्लेक्स-फ्यूल’ ही कार या तंत्रज्ञानावर आधारित आहे. या कारला पेट्रोलची गरज भासणार नाही. इथेनॉलचा वापर आणि हायब्रिड तंत्रज्ञानामुळे वाहन चालवण्याचा खर्च पेट्रोलच्या तुलनेत मोठ्या प्रमाणात कमी होऊ शकतो, असा दावा गडकरी यांनी केला आहे. इंधनाच्या वाढत्या किमतीमुळे त्रस्त असलेल्या वाहनचालकांसाठी ही घोषणा महत्त्वाची मानली जात आहे.

गडकरी यांच्या माहितीनुसार, या कारमध्ये इथेनॉलवर चालणारे इंजिन आणि स्ट्राँग हायब्रिड तंत्रज्ञानाचा वापर करण्यात आला आहे. हायब्रिड प्रणालीमुळे कारचा काही प्रवास इलेक्ट्रिक मोडवर होऊ शकतो आणि त्यामुळे इंधनाचा वापर कमी होण्यास मदत होते. गडकरी यांनी अशा कारचा चालवण्याचा खर्च पेट्रोलच्या तुलनेत सुमारे २५ रुपये प्रतिलिटर इतका असल्याचे सांगितले आहे. मात्र, हा आकडा इथेनॉलची किंमत आणि हायब्रिड प्रणालीच्या कार्यक्षमतेवर आधारित आहे. टोयोटाच्या चाचणी परिस्थितीनुसार, हायब्रिड प्रणाली काही वेळ इंजिन बंद ठेवू शकते आणि काही अंतर इलेक्ट्रिक मोडवरही कार चालवू शकते. मात्र, प्रत्यक्ष रस्त्यावर आणि रोजच्या वापरात ही कामगिरी किती राहते, हे वाहन उपलब्ध झाल्यानंतर स्पष्ट होणार आहे.
हे ही वाचा:
डीजेच्या कर्णकर्कश आवाजावर विद्यानंद बापट संतापले

आसाममध्ये हिमंता सरकारने ‘कॉक्रोच’च्या आशुतोष रांकाला घेतले ताब्यात

इथेनॉलवर चालणाऱ्या वाहनांचा वापर वाढवण्यामागे पेट्रोलियम आयातीवरील भारताचे अवलंबित्व कमी करणे हाही महत्त्वाचा उद्देश आहे. इथेनॉल निर्मितीसाठी कृषी उत्पादनांचा वापर होत असल्याने त्याचा फायदा शेतकऱ्यांनाही होऊ शकतो. भारतात सध्या इथेनॉल मिश्रित पेट्रोलच्या वापराबाबत चर्चा सुरू असून, इथेनॉलमुळे वाहनांच्या मायलेजवर होणाऱ्या परिणामाबाबतही प्रश्न उपस्थित केले जात आहेत. गडकरी यांनी मात्र भारतात इथेनॉल मिश्रित इंधनावर चालणाऱ्या वाहनांबाबत कोणतीही तक्रार आलेली नसल्याचे सांगितले आहे. आता १०० टक्के इथेनॉलवर चालणारी इनोव्हा प्रत्यक्ष बाजारात आल्यानंतर तिचा खर्च, मायलेज आणि कार्यक्षमता याबाबत अधिक स्पष्ट चित्र समोर येणार आहे.