इस्रायलला जाणाऱ्या फ्लाइटसाठीच फ्लायदुबईची निवड!

फ्लायदुबईच्या विमानात कॅप्टन स्मित माछर यांच्यावर झालेल्या हल्ल्यामागे मोठा कट असल्याची माहिती तपासातून समोर आली आहे. ओमानी को-पायलट हम्माम अल-हम्मामी याने फ्लायदुबईमध्ये नोकरी मिळण्यापूर्वीच हल्ल्याची योजना आखल्याचा तपास यंत्रणांना दिलेल्या जबाबात दावा करण्यात आला आहे. विशेष म्हणजे, इस्रायलला जाणारी विमानसेवा असल्यामुळेच त्याने फ्लायदुबईची निवड केल्याचेही त्याने तपास अधिकाऱ्यांना सांगितल्याचे वृत्त आहे.

हम्मामीच्या म्हणण्यानुसार, त्याने आधीच कोणती विमान कंपनी तेल अवीवला उड्डाणे चालवते, याचा शोध घेतला होता. त्यानंतर फ्लायदुबईमध्ये जाण्याचा निर्णय घेतला. म्हणजेच, विमान कंपनीत दाखल होण्यापूर्वीच हल्ल्याचा विचार त्याच्या मनात होता, असा तपासातील दावा आहे. या कटाची तयारी करण्यासाठी हम्मामीने यापूर्वी इस्रायलला केलेल्या प्रवासांचाही वापर केल्याचे समोर आले आहे. या प्रवासांदरम्यान त्याने हल्ल्याच्या नियोजनासाठी आवश्यक माहिती गोळा केल्याचे तपासात सांगितले आहे. सुरुवातीला हा हल्ला जुलैमध्ये करण्याची त्याची योजना होती. मात्र, त्यावेळी विमानातील एका क्रू सदस्याशी त्याची मैत्री झाली आणि त्यानंतर त्याने आपली योजना पुढे ढकलल्याचा दावा त्याने केला.

तपासातील माहितीनुसार, त्याची योजना केवळ विमानात हल्ला करण्यापुरती मर्यादित नव्हती. जर विमान इस्रायलपर्यंत पोहोचवणे शक्य झाले नाही, तर ते जॉर्डनमधील अमेरिकन लष्करी तळावर नेऊन आदळवण्याचाही पर्यायी कट त्याने आखला होता, असे त्याने तपास अधिकाऱ्यांना सांगितल्याचे वृत्त आहे.

हे ही वाचा:

फ्रान्समध्ये शिक्षण व्यवस्थेविरोधात विद्यार्थ्यांचा एल्गार

विधान परिषद निवडणुकीसाठी भाजपकडून तीन उमेदवारांची घोषणा

भारतीय बॉक्सिंगची वाटचाल ४४व्या क्रमांकावरून पहिल्या क्रमांकावर!

शेख हसीना यांना भारताने नाही, बांगलादेशच्या लष्करी विमानाने आणले

विमानाच्या कॉकपिटमध्ये हम्मामीने कॅप्टन स्मित माछर यांच्यावर हल्ला केला. हल्ल्यानंतर विमानावरील नियंत्रण धोक्यात आले होते. मात्र, कॅप्टन माछर आणि इतर क्रू सदस्यांनी परिस्थिती हाताळत विमानावरील नियंत्रण पुन्हा मिळवले. प्रवाशांनीही हल्लेखोराला रोखण्यासाठी मदत केल्याची माहिती यापूर्वी समोर आली आहे. सध्या हम्मामीने तपास अधिकाऱ्यांना दिलेल्या जबाबातील माहितीच्या आधारे या कटाचा तपास सुरू आहे. त्यामुळे त्याने सांगितलेल्या प्रत्येक दाव्याची स्वतंत्र पडताळणी तपास यंत्रणांकडून केली जात आहे.