बांगलादेशात भारतविरोधी पोस्टर्स लावत टागोरांच्या भित्तिचित्राची विटंबना

बांगलादेशातील खुलना शहरात नोबेल पुरस्कार विजेते साहित्यिक रवींद्रनाथ टागोर यांच्या भित्तिचित्राची अज्ञात व्यक्तींनी विटंबना केली आहे. खुलना रेल्वे स्थानकाच्या संरक्षक भिंतीवरील त्यांच्या चित्रावर काळी शाई फासण्यात आली. तसेच, या चित्राशेजारी टागोर मुस्लिम आणि पूर्व बंगालविरोधी असल्याचा आरोप करणारे आणि भारताच्या गौरवीकरणाला विरोध करणारे पोस्टर्स लावण्यात आले. या घटनेचा स्थानिक नागरिक आणि सांस्कृतिक क्षेत्रातून निषेध होत असून पोलिसांनी तपास सुरू केला आहे.

खुलना रेल्वे स्थानकाच्या भिंतीवर बंगालच्या कला, साहित्य आणि संस्कृतीशी संबंधित अनेक प्रसिद्ध व्यक्तींची चित्रे साकारण्यात आली आहेत. यामध्ये फकीर लालन शाह, चित्रकार एस. एम. सुलतान, काझी नजरूल इस्लाम, माजी पंतप्रधान खालिदा झिया, माजी राष्ट्राध्यक्ष झिया उर रहमान आणि कवी मायकेल मधुसूदन दत्त यांचा समावेश आहे. मात्र, या सर्व चित्रांपैकी केवळ टागोर यांच्या चित्राची विटंबना करण्यात आली.

शुक्रवारी सकाळी हा प्रकार उघडकीस आला. खुलना सदर पोलीस ठाण्याचे प्रभारी अधिकारी लोकमान हुसेन यांनी पोलिसांना माहिती मिळाल्यानंतर तपास सुरू केल्याचे सांगितले. मात्र, रस्त्याच्या पलीकडील दुकाने बंद असल्याने घटनेच्या वेळी कोण उपस्थित होते, याची माहिती मिळवणे कठीण जात असल्याचे त्यांनी स्पष्ट केले.

हे ही वाचा:

अरुणाचल प्रदेशात ४५८ एकरवरील गांजाची अवैध शेती उद्ध्वस्त

कर्नाटकात आलेल्या केरळमच्या बसवर दाऊदचा उदोउदो!

बिश्नोई टोळीचा सदस्य हॅरी बॉक्सरला अमेरिकेत अटक

शरद पवारांना रुग्णालयातून डिस्चार्ज

दरम्यान, ऑक्टोबरमध्ये ढाका येथेही टागोर यांच्या भित्तिचित्राची विटंबना झाली होती. त्या प्रकरणात पोलिसांनी चौघांना ताब्यात घेतले होते. त्यात स्टेट डायलॉग फोरमचे सदस्य सचिव अल नूर मोहम्मद अयाश यांचाही समावेश होता. खुलना येथील ताज्या घटनेमुळे बांगलादेशातील सांस्कृतिक वारशाच्या सुरक्षेचा मुद्दा पुन्हा ऐरणीवर आला आहे.