कार्ल्सबर्ग इंडियाचा आयपीओ लवकरच मार्केटमध्ये

डॅनिश बिअर आणि बेव्हरेज क्षेत्रातील आघाडीची कंपनी कार्ल्सबर्ग सध्या आपल्या भारतीय उपकंपनी कार्ल्सबर्ग इंडियाचा आयपीओ आणण्याचा विचार करत आहे. कंपनीच्या अलीकडील आर्थिक निकालात अपेक्षेपेक्षा चांगला नफा नोंदवला गेल्यानंतर भारतीय आयपीओचा मुद्दा पुन्हा चर्चेत आला आहे. मात्र सध्या याबाबत कोणताही अंतिम निर्णय झालेला नसून, हा केवळ धोरणात्मक विचार असल्याचे कंपनीकडून स्पष्ट करण्यात आले आहे.

कार्ल्सबर्गचे मुख्य कार्यकारी अधिकारी जेकब आरुप-अँडरसन यांनी सांगितले की भारत हा कंपनीसाठी अत्यंत महत्त्वाचा आणि वेगाने वाढणारा बाजार आहे. त्यामुळे भारतातील व्यवसायाचे स्वतंत्रपणे मूल्यांकन करून सार्वजनिक बाजारात आणण्याचा पर्याय तपासला जात आहे. योग्य वेळ, बाजारातील परिस्थिती आणि गुंतवणूकदारांची मागणी पाहूनच आयपीओबाबत पुढील पाऊल उचलले जाईल, असेही त्यांनी स्पष्ट केले.
हे ही वाचा:
पंतप्रधानांच्या भाषणाआधीच लोकसभा तहकूब

थॉमसची शतकी तोफ! ऑस्ट्रेलियाला हरवून इंग्लंड फायनलमध्ये

भारतीय आयपीओचा विचार करण्यामागे कार्ल्सबर्गची मुख्य उद्दिष्टे म्हणजे कंपनीवरील कर्जाचा बोजा कमी करणे आणि भागधारकांसाठी अधिक मूल्य निर्माण करणे ही आहेत. बाजारातील तज्ज्ञांच्या मते, जर कंपनीने कार्ल्सबर्ग इंडियामधील सुमारे २५ टक्के हिस्सा विक्रीस काढला, तर त्यातून अंदाजे ५ अब्ज डॅनिश क्रोन इतका निधी उभा राहू शकतो. हा निधी प्रामुख्याने कर्जफेडीसाठी वापरला जाऊ शकतो. त्यानंतर भविष्यात समभाग पुनर्खरेदी किंवा इतर गुंतवणूक पर्यायांचा विचार केला जाऊ शकतो.

कार्ल्सबर्ग इंडियाची आर्थिक कामगिरी गेल्या काही वर्षांत मजबूत राहिली आहे. आर्थिक वर्ष २०२३–२४ मध्ये कंपनीचे उत्पन्न ८,००० कोटी रुपयांपेक्षा अधिक असल्याचे सांगितले जाते. याच काळात कंपनीच्या नफ्यातही मोठी वाढ होऊन तो सुमारे ३२० कोटी रुपयांपर्यंत पोहोचल्याचे दिसते. वाढती शहरी मागणी, प्रीमियम बिअरची लोकप्रियता आणि विस्तारलेले वितरण जाळे यामुळे ही वाढ शक्य झाली आहे.

भारतीय आयपीओच्या चर्चेमुळे कार्ल्सबर्गच्या जागतिक समभागांमध्येही सकारात्मक प्रतिक्रिया उमटली आहे. कंपनीने जाहीर केलेल्या माहितीनुसार, गेल्या आर्थिक वर्षात ऑपरेटिंग नफ्यात सुमारे ५ टक्क्यांची वाढ झाली आहे. त्यामुळे भारतातील युनिटचे सूचीकरण केल्यास कंपनीच्या एकूण आर्थिक स्थितीला आणखी बळ मिळेल, असा अंदाज व्यक्त केला जात आहे.

तथापि, मद्यविक्रीसंबंधी राज्यनिहाय नियम, नियामक मंजुरी आणि बाजारातील चढउतार या बाबी लक्षात घेता आयपीओबाबत घाई केली जाणार नाही. योग्य वेळ आल्यावरच कार्ल्सबर्ग इंडिया आयपीओबाबत अंतिम निर्णय जाहीर केला जाईल, असे कंपनीकडून संकेत देण्यात आले आहेत.