दिवाळीत देशभरात ५ लाख कोटींच्या वस्तूंची विक्रमी विक्री

दिवाळीच्या खरेदीचा देशभरात विक्रमी उत्साह पाहायला मिळत असून, यंदाच्या सणासुदीच्या हंगामात भारतीय बाजारपेठेत तब्बल ५ लाख कोटी रुपयांच्या व्यापाराचा अंदाज व्यक्त करण्यात आला आहे. कॉन्फेडरेशन ऑफ ट्रेड अँड इंडस्ट्री अर्थात सीटीआयचे अध्यक्ष बृजेश गोयल यांनी हा अंदाज व्यक्त केला आहे. विशेष म्हणजे, वस्तूंच्या खरेदीसोबतच हॉटेल, रेस्टॉरंट, मॉल्स, पर्यटन, मनोरंजन आणि इतर सेवा क्षेत्रांमधील व्यवहारांमुळे या उलाढालीत मोठी भर पडणार आहे. गेल्या काही महिन्यांतील आर्थिक आव्हाने आणि बाजारातील चढ-उतारांनंतरही ग्राहकांकडून खरेदीला मिळणारा प्रतिसाद देशांतर्गत मागणी मजबूत असल्याचे संकेत देत आहे.

यंदाच्या दिवाळीच्या खरेदीत वाहन बाजारानेही महत्त्वपूर्ण योगदान दिले आहे. वाहन उद्योग संघटनेच्या अलीकडील आकडेवारीनुसार, वाहनांच्या एकूण किरकोळ विक्रीत ५५ टक्क्यांची वाढ नोंदवण्यात आली आहे. यामध्ये दुचाकींच्या विक्रीत ५२ टक्के, तीनचाकी वाहनांमध्ये ११० टक्के, व्यावसायिक वाहनांमध्ये ४८ टक्के, खासगी वाहनांमध्ये ७० टक्के, तर ट्रॅक्टर विक्रीत ५८ टक्क्यांची वाढ झाली आहे. वाहन खरेदीसाठी ग्राहकांचा वाढता प्रतिसाद हा ग्रामीण आणि शहरी अशा दोन्ही बाजारपेठांमधील मागणीचे महत्त्व अधोरेखित करतो.
हे ही वाचा:
शरद पवारांना रुग्णालयातून डिस्चार्ज

१० लाखांचे बक्षीस असलेला झारखंडचा नक्षलवादी ठाकुर्लीतून अटकेत

यंदाच्या खरेदीतील आणखी एक महत्त्वाचा बदल म्हणजे भारतीय बनावटीच्या वस्तूंना मिळणारी पसंती. मातीचे दिवे, हस्तकला वस्तू, पूजेचे साहित्य, घरसजावटीच्या वस्तू, कपडे, इलेक्ट्रॉनिक्स, मोबाईल, फर्निचर, मिठाई आणि भेटवस्तूंना बाजारपेठेत मोठी मागणी आहे. दिवाळीच्या काळात छोट्या-मोठ्या श्रेणीतील सुमारे ५ कोटी भेटवस्तूंची देवाणघेवाण होत असल्याचा अंदाज आहे. त्यामुळे स्थानिक कारागीर, लघुउद्योजक आणि छोट्या व्यापाऱ्यांनाही मोठा आर्थिक लाभ मिळण्याची शक्यता आहे.

दरम्यान, देशाची राजधानी दिल्लीत दिवाळीनिमित्त सुमारे ८० हजार कोटी रुपयांच्या व्यापाराचा अंदाज व्यक्त करण्यात आला आहे. ऑक्टोबर महिन्यातील आंदोलने आणि मोर्चांमुळे दिल्लीतील व्यापाऱ्यांचे सुमारे १४ हजार कोटी रुपयांचे नुकसान झाल्याचा दावा करण्यात आला होता. त्यामुळे दिवाळीच्या खरेदीकडून व्यापाऱ्यांना मोठ्या अपेक्षा आहेत. एकूणच, यंदाची दिवाळी केवळ सणासुदीच्या उत्साहापुरती मर्यादित न राहता देशातील किरकोळ व्यापार, वाहन उद्योग, सेवा क्षेत्र आणि स्थानिक उत्पादनांना चालना देणारी ठरत आहे.