कच्च्या तेलाच्या दरात झालेली घसरण, परदेशी पोर्टफोलिओ गुंतवणूकदारांकडून (FPI) होणारी निधीची माघार कमी होणे आणि रुपयातील मालमत्तांमध्ये वाढलेले आकर्षण यामुळे भारताची आर्थिक स्थिती अधिक मजबूत होत असल्याचे डीएसपी (DSP) च्या ताज्या अहवालात नमूद करण्यात आले आहे. या सकारात्मक घडामोडींमुळे देशाच्या आर्थिक वाढीचा वेग आगामी काळात आणखी वाढण्याची शक्यता व्यक्त करण्यात आली आहे.
अहवालानुसार, आर्थिक वाढीला चालना देण्यासाठी भारतीय रिझर्व्ह बँक (आरबीआय) आगामी काळातही अनुकूल पतधोरण कायम ठेवू शकते. बाजारात पुरेशी तरलता राखली गेल्यास रोख्यांवरील उत्पन्नदर (बाँड यिल्ड) हळूहळू कमी होण्याची शक्यता असून, त्याचा उद्योग आणि गुंतवणुकीवर सकारात्मक परिणाम होईल.
डीएसपीच्या मते, देशात सध्या उत्पादन क्षमता पुरेशी उपलब्ध असून ग्राहकांकडून मागणीतही टप्प्याटप्प्याने वाढ होत आहे. त्यामुळे आर्थिक वाढीचा पाया अधिक मजबूत होत असून, नाममात्र जीडीपी वाढ (Nominal Growth) वेग घेतल्यास कंपन्यांच्या महसुलात आणि नफ्यात सुधारणा होण्याची शक्यता आहे. अहवालात असेही नमूद करण्यात आले आहे की, २०२६-२७ या आर्थिक वर्षातील भारताचा बॅलन्स ऑफ पेमेंट हा यापूर्वी चिंतेचा विषय मानला जात होता. मात्र, सध्याच्या परिस्थितीत तोच भारताच्या अर्थव्यवस्थेची ताकद ठरू शकतो.
रुपयातील गुंतवणुकीवर मिळणारा तुलनेने चांगला परतावा, रिअल इफेक्टिव्ह एक्स्चेंज रेट (REER) आकर्षक स्तरावर असणे, मोठ्या कंपन्यांचे समभाग वाजवी किमतीत उपलब्ध असणे आणि परदेशी गुंतवणूकदारांकडून कर्जरोख्यांमध्ये वाढलेली गुंतवणूक या सर्व घटकांमुळे भारताची व्यापक आर्थिक परिस्थिती अधिक सक्षम झाल्याचे अहवालात म्हटले आहे. मे २०२६ मध्ये भारताचा REER निर्देशांक ८८ च्या खाली पोहोचला होता. सहसा अशी पातळी गंभीर आर्थिक संकटाच्या काळात पाहायला मिळते. मात्र, भारत आणि अमेरिकेतील महागाईतील फरक कमी झाल्यामुळे रुपयाचे दीर्घकालीन अवमूल्यन होण्याचा धोका कमी झाल्याचे अहवालात स्पष्ट करण्यात आले आहे.
भांडवली बाजाराबाबत डीएसपीने लार्ज-कॅप समभागांवर अधिक विश्वास व्यक्त केला आहे. कंपन्यांच्या महसुलात सुधारणा झाल्यास या समभागांमध्ये चांगली तेजी पाहायला मिळू शकते, असे अहवालात नमूद करण्यात आले आहे. अर्थव्यवस्थेला गती मिळाल्यास कर्जवाटप वाढेल, ग्राहकांची मागणी मजबूत होईल आणि पायाभूत सुविधा व बांधकाम क्षेत्रातील हालचालींना वेग येईल. याचा सर्वाधिक लाभ सिमेंट उद्योगाला होण्याची शक्यता असून, दीर्घकाळ दबावाखाली असलेल्या या क्षेत्राच्या कामगिरीत सुधारणा होऊ शकते.
हे ही वाचा:
८० वर्षांनंतर न्याय! ९,९०९ हुतात्मा सैनिकांची नावे अधिकृत यादीत
नीरव मोदीच्या प्रत्यार्पणाचा मार्ग मोकळा!
सॉफ्टवेअर कंपनी SAP ने भरती थांबवली; AI वर करणार लक्ष्य
‘डिजिटल अरेस्ट’ घोटाळ्याने भारतीयांना ४,०५७ कोटींचा फटका
दुसरीकडे, निफ्टी आयटी क्षेत्रातील समभाग सध्या आकर्षक मूल्यांकनावर उपलब्ध असले तरी त्यांच्या भविष्यातील वाढीच्या वेगाबाबत काहीशी अनिश्चितता कायम असल्याचे डीएसपीने म्हटले आहे. अहवालात पुढे असेही नमूद करण्यात आले आहे की, सध्या उदयोन्मुख बाजारपेठांमधील वाढ मोठ्या प्रमाणात तंत्रज्ञान कंपन्यांवर अवलंबून आहे. विशेषतः दक्षिण कोरिया आणि तैवानमधील टेक कंपन्यांचे या निर्देशांकांमधील वर्चस्व वाढल्याने गुंतवणूक काही मोजक्या समभागांपुरती मर्यादित झाली आहे. अशा पार्श्वभूमीवर भारत अधिक संतुलित, स्थिर आणि दीर्घकालीन दृष्टीने आकर्षक गुंतवणूक पर्याय म्हणून उदयास येत असल्याचे डीएसपीच्या अहवालात नमूद करण्यात आले आहे.