देशभरातील नागरिकांना पुन्हा एकदा महागाईचा झटका बसला असून पेट्रोल आणि डिझेलच्या वाढत्या दरांनी सर्वसामान्यांचे बजेट कोलमडण्याची चिन्हे दिसू लागली आहेत. आंतरराष्ट्रीय बाजारात कच्च्या तेलाच्या किंमतींमध्ये सुरू असलेल्या चढ-उताराचा थेट परिणाम भारतातील इंधन दरांवर होत असून २१ मे रोजी तेल कंपन्यांनी जाहीर केलेल्या नव्या दरांनुसार अनेक शहरांमध्ये पेट्रोल आणि डिझेलचे दर उच्चांकावर कायम आहेत.
दिल्लीमध्ये पेट्रोलचा दर जवळपास ९९ रुपयांच्या घरात पोहोचला असून डिझेलही ९२ रुपयांच्या पुढे गेले आहे. आर्थिक राजधानी मुंबईत पेट्रोलने १०७ रुपयांचा टप्पा ओलांडला असून डिझेलचे दरही ९४ रुपयांच्या पुढे कायम आहेत. चेन्नई, कोलकाता, बंगळुरू आणि हैदराबादसारख्या महानगरांमध्येही इंधन दरांनी सर्वसामान्य नागरिकांच्या खिशाला मोठी झळ दिली आहे. काही दिवसांपूर्वीच केंद्र सरकार आणि तेल कंपन्यांनी पेट्रोल-डिझेलच्या दरात प्रतिलिटर सुमारे ३ रुपयांची वाढ केली होती. त्यानंतर आज दर स्थिर ठेवले असले तरी महागाईचा ताण कायम असल्याचे चित्र आहे. मुंबईमध्ये आज पेट्रोलचा दर प्रतिलिटर सुमारे १०७.५९ रुपये असून डिझेल ९४.०५ रुपयांच्या आसपास आहे. तर पुण्यात पेट्रोलचा दर प्रतिलिटर सुमारे १०७.०१ रुपये असून डिझेल ९४.८६ रुपयांपर्यंत पोहोचले आहे.
हे ही वाचा:
“नरसंहाराचा इतिहास असलेल्या राष्ट्राने काश्मीरवर व्याख्यान देणे हा विरोधाभास”
‘मेक इन इंडिया’चे यश; ‘सूर्यास्त्र’ रॉकेट प्रणालीची यशस्वी चाचणी
जनादेश बुलडोझरसाठीच होता, माय लॉर्ड
मध्यपूर्वेतील वाढता तणाव आणि जागतिक बाजारातील अनिश्चिततेमुळे कच्च्या तेलाच्या पुरवठ्यावर दबाव निर्माण झाला आहे. विशेषतः इराण परिसरातील संघर्षामुळे ब्रेंट क्रूडच्या किंमतींमध्ये मोठी वाढ झाली असून त्याचा परिणाम भारतासारख्या तेल आयात करणाऱ्या देशांवर होत आहे. भारत आपल्या गरजेपैकी मोठ्या प्रमाणात कच्चे तेल परदेशातून आयात करतो. त्यामुळे डॉलरच्या तुलनेत रुपयाची घसरण आणि वाढता आयात खर्च यामुळे तेल कंपन्यांवरील आर्थिक ताण वाढत आहे.
तज्ज्ञांच्या मते, सध्याची परिस्थिती कायम राहिल्यास येत्या काही दिवसांत पेट्रोल आणि डिझेलचे दर आणखी वाढण्याची शक्यता नाकारता येत नाही. इंधन दरवाढीचा परिणाम केवळ वाहनधारकांपुरता मर्यादित राहत नाही, तर वाहतूक खर्च वाढल्याने भाजीपाला, अन्नधान्य, दूध, फळे आणि दैनंदिन गरजेच्या वस्तूंच्या किंमतींवरही त्याचा परिणाम होतो. त्यामुळे सर्वसामान्य नागरिकांमध्ये महागाईबाबत चिंता वाढताना दिसत आहे.
दरम्यान, वाढत्या इंधन दरांविरोधात काही शहरांमध्ये टॅक्सी आणि ऑटो चालक संघटनांनी नाराजी व्यक्त केली आहे. वाढत्या खर्चामुळे प्रवासी भाडेवाढीची शक्यता निर्माण झाली असून त्याचा थेट फटका सामान्य नागरिकांना बसू शकतो. त्यामुळे पेट्रोल-डिझेलचे दर आता केवळ वाहनांच्या टाक्यांपुरते मर्यादित न राहता देशाच्या अर्थव्यवस्थेवर आणि सर्वसामान्यांच्या दैनंदिन जीवनावर परिणाम करणारा महत्त्वाचा मुद्दा बनला आहे.
