सोने-चांदीच्या दरात मोठी घसरण; ग्राहकांना दिलासा

सोन्या-चांदीच्या सातत्याने वाढणाऱ्या दरांना अखेर ब्रेक लागला असून २४ जुलै रोजी सराफा बाजारात दोन्ही मौल्यवान धातूंच्या किमतीत लक्षणीय घसरण झाली आहे. त्यामुळे लग्नसराई, सणासुदीची खरेदी आणि गुंतवणुकीचा विचार करणाऱ्या ग्राहकांना मोठा दिलासा मिळाला आहे. आंतरराष्ट्रीय बाजारातील घसरण, कच्च्या तेलाच्या वाढलेल्या किमती आणि अमेरिकेतील व्याजदर वाढीच्या शक्यतेमुळे सोन्या-चांदीवर दबाव निर्माण झाला असून त्याचे प्रतिबिंब भारतीय बाजारातही दिसून आले आहे.

आजच्या दरांनुसार २४ कॅरेट सोन्याचा भाव १० ग्रॅममागे सुमारे ₹१,४२,०९५ इतका आहे, तर २२ कॅरेट सोन्याचा दर ₹१,३०,१५९ प्रति १० ग्रॅम आहे. त्याचवेळी चांदीचा भाव सुमारे ₹२.३५ लाख प्रति किलो (₹२३५ प्रति ग्रॅम) या पातळीवर आहे. मागील दोन दिवसांत सोन्याच्या दरात सुमारे ₹३,५०० ते ₹४,४०० प्रति १० ग्रॅम, तर चांदीच्या दरात ₹८,७०० ते ₹९,६०० प्रति किलो इतकी घसरण नोंदवली गेली आहे.
हे ही वाचा:
कॉक्रोच जनता पार्टी शिक्षणमंत्र्यांच्या राजीनाम्यावर ठाम

मुंबई विमानतळावर जप्त ५ कोटींच्या सोनेप्रकरणात स्वच्छता कर्मचारी, हँडलर

तज्ज्ञांच्या मते, ब्रेंट क्रूड ऑईलचा भाव १०० डॉलर प्रति बॅरलच्या पुढे गेल्याने महागाई वाढण्याची शक्यता निर्माण झाली आहे. परिणामी अमेरिकेची फेडरल रिझर्व्ह व्याजदर दीर्घकाळ उच्च पातळीवर ठेवू शकते, अशी अपेक्षा आहे. व्याजदर वाढल्यास व्याज न देणाऱ्या सोन्यासारख्या गुंतवणूक पर्यायांची आकर्षकता कमी होते आणि त्यामुळे गुंतवणूकदारांकडून नफा वसुली केली जाते. याच कारणामुळे सोन्या-चांदीच्या किमतींमध्ये मोठी घसरण झाली आहे.

मात्र, दीर्घकालीन दृष्टीने चित्र अद्याप सकारात्मक असल्याचे तज्ज्ञांचे मत आहे. जागतिक भू-राजकीय तणाव, मध्यवर्ती बँकांकडून सुरू असलेली सोन्याची खरेदी आणि सुरक्षित गुंतवणुकीची वाढती मागणी यामुळे भविष्यात सोन्याच्या किमती पुन्हा वाढू शकतात. त्यामुळे अल्पकालीन घसरणीकडे घाबरून न पाहता टप्प्याटप्प्याने गुंतवणूक करण्याचा सल्ला दिला जात आहे.