कॉक्रोच जनता पार्टी शिक्षणमंत्र्यांच्या राजीनाम्यावर ठाम

कॉकरोच जनता पक्षाने (CJP) केंद्र सरकारला स्पष्ट शब्दांत सांगितले की, केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी ही कोणत्याही परिस्थितीत मागे घेतली जाणार नाही. कॉक्रोचच्या नेत्यांनी केंद्रीय मंत्री जे. पी. नड्डा यांच्यासोबत दुसऱ्या फेरीची चर्चा केली. जंतर-मंतरवरील विद्यार्थी आंदोलनाचे नेतृत्व करणाऱ्या कॉक्रोचचा दावा आहे की, सरकारने त्यांच्या मागणीवर उत्तर देण्यासाठी शनिवारी दुपारपर्यंत वेळ मागितला आहे.

शिक्षणमंत्री धर्मेंद्र प्रधान यांच्या राजीनाम्याची मागणी हा महिनाभर सुरू असलेल्या कॉक्रोच आंदोलनाचा मुख्य मुद्दा राहिला आहे. २० जुलै रोजी विद्यार्थी संसदेकडे मोर्चा काढण्याचा प्रयत्न करत असताना आंदोलन हिंसक झाले होते. धर्मेंद्र प्रधान यांनी शिक्षणमंत्रीपदाचा राजीनामा दिला नाही, तर आंदोलन आणखी तीव्र करण्याचा इशारा कॉक्रोचने दिला आहे.

कॉक्रोच जनता पार्टी आणि सरकारच्या बैठकीत काय घडले?

संविधान क्लबमध्ये जवळपास दोन तास चाललेल्या बैठकीनंतर कॉक्रोचचे राष्ट्रीय प्रवक्ते आशुतोष रंका यांनी सांगितले की, सरकारने त्यांच्या दोन मागण्यांना तत्त्वतः मान्यता दिली आहे. कॉक्रोचने नीट (NEET) परीक्षेच्या उमेदवारांनी आत्महत्या केलेल्या कुटुंबांना प्रत्येकी १ कोटी रुपयांची नुकसानभरपाई देण्याची आणि आंदोलन करणाऱ्या विद्यार्थ्यांवर कोणतीही कारवाई न करण्याची मागणी केली आहे.

हे ही वाचा:

अमेरिकेतील ७ टेक दिग्गज कंपन्यांचे एका दिवसात ७४ लाख कोटी रुपये बुडाले

शिवसेनेचे उपसभापती सचिन अहिर यांच्या घरात अडीच कोटींची चोरी

सौदी राजपुत्राच्या मृत्यूचं गूढ अखेर उलगडले

नाशिकमध्ये गोदावरीला मोसमातील सर्वात मोठा पूर

रंका म्हणाले, “धर्मेंद्र प्रधान यांच्या राजीनाम्याच्या मागणीवर सरकारने उद्या दुपारपर्यंत वेळ मागितला आहे. सरकार त्यांना लवकरच पदावरून दूर करेल, अशी आम्हाला अपेक्षा आहे.” ते पुढे म्हणाले, “आत्महत्या केलेल्या नीट विद्यार्थ्यांच्या कुटुंबांना नुकसानभरपाई आणि विद्यार्थ्यांवरील एफआयआर व इतर कायदेशीर कारवाई मागे घेण्याच्या आमच्या दोन मागण्यांना सरकारने तत्त्वतः मान्यता दिली आहे.”

CJP आणि सरकार यांच्यातील तिसऱ्या फेरीची बैठक शनिवारी होणार असून, सरकारतर्फे केंद्रीय मंत्री जे. पी. नड्डा आणि जितेंद्र सिंह सहभागी होणार आहेत. केंद्रीय आरोग्यमंत्री जे. पी. नड्डा यांनी बैठक “सौहार्दपूर्ण” झाल्याचे सांगितले. मात्र, सरकारने CJP च्या कोणत्याही मागण्या मान्य केल्या आहेत का, याबाबत त्यांनी स्पष्ट भूमिका घेतली नाही.

नड्डा म्हणाले, “त्यांच्या तीन प्रमुख मागण्या आणि परीक्षा व्यवस्थेतील सुधारणांबाबत पाच सूचना आहेत. आम्ही त्यांना उद्या दुपारी पुन्हा भेटणार असल्याचे सांगितले आहे.”

आंदोलन शमवण्यासाठी सरकारची हालचाल

विद्यार्थ्यांमधील नाराजी कमी करण्यासाठी सरकारने प्रयत्न वाढवले आहेत. या पार्श्वभूमीवर केंद्रीय मंत्रिमंडळाने प्रश्नपत्रिका फुटीच्या प्रकरणांमध्ये दोषींना अधिक कठोर शिक्षा देण्याचा प्रस्ताव असलेल्या विधेयकाला मंजुरी दिली. पंतप्रधान नरेंद्र मोदी यांनीही उशिरा रात्री प्रसिद्ध केलेल्या सेल्फी व्हिडिओत प्रश्नपत्रिका फुटीविरोधात कठोर कारवाईचे आश्वासन दिले होते. त्यापूर्वी त्यांनी अशा प्रकरणांसाठी स्वतंत्र जलदगती न्यायालये स्थापन करण्याची घोषणा केली होती.

सूत्रांच्या माहितीनुसार, नव्या विधेयकात प्रश्नपत्रिका फुटीच्या दोषींना १० वर्षांपर्यंत तुरुंगवास आणि १० कोटी रुपयांपर्यंत दंड करण्याची तरतूद असू शकते. सध्या या गुन्ह्यासाठी ३ ते ५ वर्षांचा कारावास आणि १० लाख रुपयांपर्यंत दंड अशी शिक्षा आहे. आंदोलनाच्या पार्श्वभूमीवर सरकारने शिक्षण सचिवांचीही बदली केली. मे महिन्यात झालेल्या नीट-यूजी प्रश्नपत्रिका फुटीच्या प्रकरणानंतरची ही पहिली मोठी प्रशासकीय कारवाई मानली जात आहे.

दरम्यान, कॉक्रोच आंदोलनाला वेग देणारे सामाजिक कार्यकर्ते सोनम वांगचुक यांनी गुरुवारी रात्री उशिरा आपले उपोषण मागे घेतले. गेल्या २५ दिवसांपासून उपोषणावर असलेल्या वांगचुक यांनी सांगितले की, आंदोलन करणाऱ्या विद्यार्थ्यांवर कोणतीही कारवाई केली जाणार नाही, असे आश्वासन सरकारकडून मिळाले आहे.

शुक्रवारी झालेल्या बैठकीमुळे सरकार आणि CJP यांच्यात संवादाचे दार खुले झाले असले, तरी धर्मेंद्र प्रधान यांच्या राजीनाम्याच्या मागणीला सरकार मान्यता देणार का, याकडे आता सर्वांचे लक्ष लागले आहे. शनिवारी होणारी बैठक निर्णायक ठरण्याची शक्यता आहे.