सोन्या-चांदीच्या सतत वाढणाऱ्या किमतींमुळे चिंतेत असलेल्या ग्राहकांना आज मोठा दिलासा मिळाला आहे. देशांतर्गत सराफा बाजारापासून ते मल्टी कमोडिटी एक्स्चेंज (एमसीएक्स) पर्यंत दोन्ही मौल्यवान धातूंच्या दरांमध्ये घसरण नोंदवण्यात आली आहे. त्यामुळे गुंतवणुकीसाठी सोने खरेदी करण्याचा विचार करणारे किंवा लग्नसराईसाठी दागिने बनवण्याची तयारी करणाऱ्यांसाठी ही आनंदाची बातमी ठरली आहे.
ताज्या आकडेवारीनुसार, किरकोळ बाजारात सोन्याच्या किमतीत प्रति १० ग्रॅम ₹६१० ची घट झाली असून २४ कॅरेट सोन्याचा भाव ₹१,५२,७९० प्रति १० ग्रॅमवर आला आहे. तर चांदीच्या दरात प्रति किलो ₹१,०४० ची घसरण झाली असून तिचा भाव ₹२,५०,५६० प्रति किलोवर पोहोचला आहे. सोन्याच्या किमतीत सुमारे ०.४० टक्के, तर चांदीच्या किमतीत ०.४१ टक्क्यांची घट नोंदवण्यात आली आहे. या घसरणीमुळे सराफा बाजारात ग्राहकांची गर्दी वाढण्याची शक्यता व्यक्त केली जात आहे.
हे ही वाचा:
मस्कने काढलं, परागने साम्राज्य उभारलं!
बंडखोर खासदारांविषयी बोलताना राऊतांची जीभ घसरली
फ्रान्समध्ये आता भारतीय पर्यटकांना यूपीआयद्वारे थेट पेमेंटची सुविधा
जून २०२२ ची पुनरावृत्ती होणार? ठाकरे गटाचे खासदार फुटीच्या उंबरठ्यावर
किरकोळ बाजारासोबतच वायदा बाजारातही आज नरमाईचे वातावरण दिसून आले. एमसीएक्सवरील ५ ऑगस्ट २०२६ डिलिव्हरीच्या सोन्याच्या करारामध्ये ₹५४८ म्हणजेच सुमारे ०.३६ टक्क्यांची घसरण झाली. त्यामुळे वायदा बाजारातील सोन्याचा दर ₹१,५२,५४३ प्रति १० ग्रॅमवर आला आहे. त्याचप्रमाणे ३ जुलै २०२६ डिलिव्हरीच्या चांदीच्या करारामध्ये ₹७३३ म्हणजेच ०.३१ टक्क्यांची घसरण झाली असून चांदीचा भाव ₹२,४९,३२३ प्रति किलोवर आला आहे.
बाजार तज्ज्ञांच्या मते, जागतिक स्तरावरील आर्थिक घडामोडी, अमेरिकेच्या फेडरल रिझर्व्हच्या व्याजदरासंदर्भातील निर्णयाची उत्सुकता आणि पश्चिम आशियातील तणाव कमी होण्याच्या शक्यतेमुळे सुरक्षित गुंतवणुकीसाठी सोन्याकडे होणारा ओघ काहीसा कमी झाला आहे. याचाच परिणाम म्हणून सोन्या-चांदीच्या दरांवर दबाव निर्माण झाला आहे.
दरम्यान, या घसरणीकडे गुंतवणूकदार आणि ग्राहक वेगवेगळ्या नजरेने पाहत आहेत. मोठ्या प्रमाणावर गुंतवणूक करणारे गुंतवणूकदार सध्या सावध भूमिका घेत असून बाजाराच्या पुढील दिशेची वाट पाहत आहेत. मात्र सर्वसामान्य ग्राहकांसाठी ही घसरण सुवर्णसंधी मानली जात आहे. गेल्या काही महिन्यांपासून सोन्याच्या विक्रमी दरांमुळे खरेदी पुढे ढकलणाऱ्यांना आता तुलनेने कमी किमतीत दागिने खरेदी करण्याची संधी मिळाली आहे.
सराफा व्यावसायिकांच्या मते, आगामी काळात जागतिक घडामोडी आणि व्याजदर धोरणांनुसार सोन्या-चांदीच्या किमतींमध्ये पुन्हा चढ-उतार होऊ शकतात. मात्र सध्या बाजारात आलेली ही नरमाई ग्राहकांसाठी दिलासादायक ठरली असून दागिने खरेदी आणि गुंतवणुकीसाठी अनुकूल वातावरण निर्माण झाले आहे. त्यामुळे अनेक ग्राहकांनी पुन्हा एकदा सराफा बाजाराकडे मोर्चा वळवण्यास सुरुवात केली आहे.
