भारतीय शेअर बाजारात बुधवारी मोठी घसरण पाहायला मिळाली. दुपारी १२:४० वाजता सेन्सेक्स १,४५१ अंकांनी म्हणजेच १.८१ टक्क्यांनी घसरून ७८,७८७ वर होता, तर निफ्टी ५० हा ४७६ अंकांनी म्हणजेच १.९१ टक्क्यांनी घसरून २४,३९२ वर स्थिरावला.
या घसरणीमुळे मुंबई शेअर बाजारावर सूचीबद्ध सर्व कंपन्यांचे एकूण बाजारमूल्य १२ लाख कोटी रुपयांनी घटून ४४५ लाख कोटी रुपयांवर आले. सोमवारी हेच बाजारमूल्य ४५६ लाख कोटी रुपये होते.
घसरणीची प्रमुख पाच कारणे:
मध्यपूर्वेतील वाढता संघर्ष:
इस्रायल, अमेरिका आणि इराण यांच्यातील तणाव व्यापक युद्धाकडे झुकत असल्याने गुंतवणूकदारांमध्ये भीतीचे वातावरण आहे. या संघर्षाचा जागतिक अर्थव्यवस्थेवर थेट परिणाम होऊ शकतो, अशी भीती व्यक्त होत आहे.
कच्च्या तेलाच्या किमतीत उसळी:
जागतिक बाजारात कच्च्या तेलाच्या दरात मोठी वाढ झाली आहे. बातमी लिहिली जात असताना डब्ल्यूटीआय क्रूड २.८६ टक्क्यांनी वाढून ७६.६९ डॉलर प्रति बॅरल, तर ब्रेंट क्रूड ३.१६ टक्क्यांनी वाढून ८३.९७ डॉलर प्रति बॅरलवर होता. कच्चे तेल चार वर्षांच्या उच्चांकावर पोहोचल्याने आयात खर्च वाढण्याची शक्यता आहे.
हे ही वाचा:
रॅपिडो चालकाच्या खात्यातून ५५० कोटींचे व्यवहार!
‘तिने’ सुरू केली घरगुती मदतीसाठी कंपनी; ८०० कोटींची उलाढाल
होर्मुझ सामुद्रधुनीत विमा न मिळाल्याने १५० हून अधिक जहाजे अडकली
या परिस्थितीत रशिया भारताला देणार मदतीचा हात!
रुपयाची विक्रमी घसरण:
डॉलरच्या तुलनेत रुपया ९२.४१ या सर्वकालीन नीचांकी पातळीवर पोहोचला आहे. चलनातील कमकुवतपणा विदेशी गुंतवणुकीसाठी प्रतिकूल मानला जातो.
विदेशी गुंतवणूकदारांची विक्री:
परदेशी संस्थात्मक गुंतवणूकदारांनी (एफआयआय) सोमवारी ३,२९५.६४ कोटी रुपयांची निव्वळ विक्री केली. जरी देशांतर्गत संस्थात्मक गुंतवणूकदारांनी (डीआयआय) ८,५९३.८७ कोटी रुपयांची गुंतवणूक केली असली, तरी एफआयआय विक्रीमुळे बाजारावर दबाव कायम आहे.
वाढलेली अस्थिरता:
बाजारातील अस्थिरता दर्शवणारा निर्देशांक इंडिया व्हीआयएक्स २१ टक्क्यांनी वाढून २१ वर पोहोचला आहे. व्हिक्समध्ये वाढ झाल्यास बाजारात आणखी घसरणीची शक्यता वाढते. एकूणच, जागतिक अनिश्चितता, तेलदरवाढ, रुपयातील कमकुवतपणा आणि विदेशी निधीची विक्री यामुळे भारतीय शेअर बाजारावर मोठा दबाव निर्माण झाला आहे.
