भारतीय शेअर बाजाराने सोमवारी (२७ जुलै) मजबूत जागतिक संकेतांच्या जोरावर सकारात्मक सुरुवात केली. मात्र, आजच्या व्यवहारात सर्वाधिक लक्ष वेधून घेतले ते आयटी क्षेत्राने. आयटी कंपन्यांच्या समभागांमध्ये जोरदार खरेदी झाल्याने निफ्टी आयटी निर्देशांक एक टक्क्यांहून अधिक वधारत सर्वाधिक तेजीत राहिला. सकाळी सेन्सेक्स ५०७ अंकांनी (०.६७ टक्के) वाढून ७६,५६७ वर, तर निफ्टी १३४ अंकांनी (०.५६ टक्के) वाढून २३,९०१ वर व्यवहार करत होता. आयटी क्षेत्रातील तेजीमुळे बाजाराला भक्कम आधार मिळाला.
इन्फोसिस, टीसीएस, एचसीएल टेक आणि टेक महिंद्रा या आघाडीच्या आयटी कंपन्यांच्या समभागांमध्ये चांगली खरेदी झाली. याशिवाय एशियन पेंट्स, बजाज फायनान्स, बजाज फिनसर्व्ह, आयटीसी, कोटक महिंद्रा बँक, टाटा स्टील, एलअँडटी, एनटीपीसी, एसबीआय, पॉवर ग्रिड, टायटन, अदाणी पोर्ट्स आणि भारती एअरटेल या समभागांमध्येही वाढ झाली. दुसरीकडे, आयसीआयसीआय बँक आणि अल्ट्राटेक सिमेंट हे दोनच समभाग घसरणीत होते.
आयटीसह इतर क्षेत्रीय निर्देशांकांमध्येही सकारात्मक वातावरण दिसून आले. निफ्टी मीडिया, एफएमसीजी, कन्झम्प्शन, पीएसयू बँक, प्रायव्हेट बँक, रिअॅल्टी, ऑटो, फार्मा, मेटल आणि एनर्जी निर्देशांकही हिरव्या निशाणावर व्यवहार करत होते. बाजारातील तेजी केवळ लार्जकॅपपुरती मर्यादित राहिली नाही. निफ्टी मिडकॅप १०० निर्देशांक ६०८ अंकांनी वाढून ६२,२३१, तर निफ्टी स्मॉलकॅप १०० निर्देशांक १७४ अंकांनी वाढून १९,०५९ वर पोहोचला.
हे ही वाचा:
मालीत भारतीय हिरे व्यापाऱ्याचे अपहरण; ४४ कोटींची ‘डील’
२०२७ ठरणार पृथ्वीवरील सर्वात उष्ण वर्ष? एल निनोचा प्रभाव कायम
विजेसाठी १२ वर्षांचा संघर्ष; जनता दरबारानंतर घरात प्रथमच पेटला बल्ब
मी मुंबईतच आहे, महाराष्ट्रातच राहणार!
बाजार विश्लेषकांच्या मते, कच्च्या तेलाच्या किंमती ९० डॉलर प्रति बॅरलच्या खाली आल्याने गुंतवणूकदारांचा आत्मविश्वास वाढला आहे. अमेरिका-इराणमधील तणाव कमी झाल्याने कच्च्या तेलाच्या किंमती घसरल्या असून, त्याचा सकारात्मक परिणाम भारतीय बाजारावर दिसून येत आहे. मात्र, परदेशी संस्थात्मक गुंतवणूकदारांचा (एफआयआय) अस्थिर गुंतवणूक कल अद्यापही बाजारासाठी चिंतेचा विषय असल्याचे तज्ज्ञांचे मत आहे.
