मध्य पूर्वेतील वाढत्या संघर्षाचे पडसाद सोमवारी (१३ जुलै) भारतीय शेअर बाजारावर उमटले. अमेरिका आणि इराणमधील तणाव तीव्र झाल्याने गुंतवणूकदारांमध्ये भीतीचे वातावरण निर्माण झाले असून, त्याचा थेट परिणाम शेअर बाजारावर झाला. आठवड्याच्या पहिल्याच व्यवहाराच्या दिवशी सेन्सेक्स आणि निफ्टी दोन्ही निर्देशांक मोठ्या घसरणीसह खुले झाले. सकाळी ९.१८ वाजता सेन्सेक्स ६४९ अंकांनी म्हणजेच ०.८४ टक्क्यांनी घसरून ७६,९२० अंकांवर पोहोचला होता. तर निफ्टी १८४ अंकांनी म्हणजेच ०.७६ टक्क्यांनी घसरून २४,०२२ अंकांवर व्यवहार करत होता.
केवळ मोठ्या कंपन्यांच्याच नव्हे, तर मध्यम आणि लघु कंपन्यांच्या समभागांवरही विक्रीचा दबाव दिसून आला. निफ्टी मिडकॅप १०० निर्देशांक २८० अंकांनी घसरून ६२,७५६, तर निफ्टी स्मॉलकॅप १०० निर्देशांक ६६ अंकांच्या घसरणीसह १९,३४९ वर व्यवहार करत होता. क्षेत्रनिहाय पाहता धातू, वित्तीय सेवा आणि ग्राहक वस्तू क्षेत्रातील समभागांना सर्वाधिक फटका बसला. याशिवाय ऑटोमोबाईल, संरक्षण, खासगी बँका, सार्वजनिक बँका, कमोडिटी, पायाभूत सुविधा, सेवा, ग्राहक टिकाऊ वस्तू, तेल व वायू तसेच एफएमसीजी क्षेत्रातील निर्देशांकही घसरणीत होते. मात्र, माहिती तंत्रज्ञान आणि औषधनिर्माण क्षेत्राने तुलनेने चांगली कामगिरी केली. निफ्टी आयटी आणि निफ्टी फार्मा हे निर्देशांक हिरव्या निशाणात व्यवहार करत होते.
सेन्सेक्समधील टीसीएस, एचसीएल टेक, पॉवर ग्रिड आणि एनटीपीसी या कंपन्यांच्या समभागांमध्ये वाढ झाली. तर टाटा स्टील, इंडिगो, मारुती सुझुकी, एशियन पेंट्स, बजाज फिनसर्व्ह, बजाज फायनान्स, एचडीएफसी बँक, एल अँड टी, इटरनल, अल्ट्राटेक सिमेंट, बीईएल, टायटन, महिंद्रा अँड महिंद्रा, भारती एअरटेल, एसबीआय, सन फार्मा, आयसीआयसीआय बँक, इन्फोसिस आणि आयटीसी यांच्या समभागांमध्ये घसरण झाली.
भारतीय बाजारासोबतच आशियातील बहुतांश शेअर बाजारांवरही तणावाचे सावट दिसून आले. टोकियो, शांघाय, हाँगकाँग, बँकॉक आणि सोल येथील बाजार घसरणीसह व्यवहार करत होते. मात्र, जकार्ता शेअर बाजाराने सकारात्मक सुरुवात केली. अमेरिकेने व्यापारी जहाजांवरील हल्ल्यांच्या पार्श्वभूमीवर इराणच्या लष्करी तळांवर हवाई कारवाई केल्यानंतर मध्य पूर्वेतील परिस्थिती अधिक चिघळली आहे. त्याला प्रत्युत्तर म्हणून इराणने कुवेत, बहरीन आणि जॉर्डनमधील अमेरिकन लष्करी तळांना लक्ष्य करण्यास सुरुवात केल्याची माहिती समोर आली आहे.
हे ही वाचा:
अमेरिकेचे इराणवर पुन्हा हल्ले; क्षेपणास्त्र प्रणाली, आयआरजीसीच्या स्पीडबोट्स लक्ष्य
ब्रिटनमध्ये उष्णतेचा कहर; दोन महिन्यांत २,७०० हून अधिक मृत्यू
आषाढी वारीला गालबोट; जेजुरीत ट्रकच्या धडकेत तीन महिला वारकऱ्यांचा मृत्यू
भायखळ्यात सात वर्षांच्या चिमुरडीवर सुरक्षा रक्षकाकडून लैंगिक अत्याचार
या संघर्षाचा सर्वात मोठा परिणाम कच्च्या तेलाच्या बाजारावर दिसून आला. जागतिक पुरवठ्यावर परिणाम होण्याच्या भीतीने ब्रेंट क्रूडचा भाव ४ टक्क्यांहून अधिक वाढून प्रतिपिंप ७९ डॉलर, तर डब्ल्यूटीआय क्रूडचा भावही ४ टक्क्यांनी वाढून प्रतिपिंप सुमारे ७४ डॉलर झाला. तेलाच्या वाढत्या किमतीमुळे भारतासारख्या आयात-आधारित अर्थव्यवस्थेवर महागाईचा दबाव वाढण्याची शक्यता व्यक्त केली जात असून, त्याचा परिणाम शेअर बाजारातील गुंतवणूकदारांच्या भावनेवरही झाला आहे.
